రైతన్నకు దీపావళి కానుక : రూ. 5,000 తక్షణ సాయం, కరెంట్ బిల్లు మాఫీ !!
ఓవైపు వర్షాభావం.. మరోవైపు చేతికొచ్చిన పంటలు దెబ్బతినడంతో రైతులు తీవ్ర ఇబ్బందులు ఎదుర్కొంటున్నారు. పశువులకు మేత దొరక్క, తాగునీటికి కూడా కష్టపడాల్సిన పరిస్థితులు నెలకొన్నాయి. ఇలాంటి క్లిష్ట సమయంలో రైతులను ఆదుకునేందుకు మహారాష్ట్ర ప్రభుత్వం మరిన్ని చర్యలు చేపట్టేందుకు సిద్ధమైంది. ఇప్పటికే ఆర్థిక సాయం ప్రకటించడంతో పాటు విద్యుత్ బిల్లులు, పాత బకాయిల మాఫీకి నిర్ణయం తీసుకున్న ప్రభుత్వం.. రానున్న రోజుల్లో మరిన్ని సంక్షేమ పథకాలను అమలు చేయనున్నట్లు ముఖ్యమంత్రి దేవేంద్ర ఫడ్నవీస్ ప్రకటించారు.
దీపావళికి రూ.5 వేల కానుక..
కరువు పరిస్థితులతో ఇబ్బందులు పడుతున్న రైతులు పండుగను సంతోషంగా జరుపుకోవాలనే ఉద్దేశంతో ప్రభుత్వం ప్రత్యేక ఆర్థిక సాయం అందిస్తోంది. ఇందులో భాగంగా రాష్ట్రంలోని సుమారు కోటిన్నర మంది రైతుల బ్యాంకు ఖాతాల్లో ఒక్కొక్కరికి రూ.5 వేల చొప్పున జమ చేస్తున్నట్లు ఫడ్నవీస్ వెల్లడించారు. ఇప్పటికే నగదు జమ ప్రక్రియ ప్రారంభమైందని, ఇంకా కొనసాగుతోందని తెలిపారు. ఈ సాయం రైతు కుటుంబాలకు కొంతమేర ఊరటనిస్తుందని ప్రభుత్వం భావిస్తోంది.
రైతుల విద్యుత్ బిల్లులు, పాత బకాయిలు మాఫీ..
కేవలం ఆర్థిక సాయంతోనే రైతుల కష్టాలు తీరవని భావించిన ప్రభుత్వం మరో కీలక నిర్ణయం తీసుకుంది. రైతులకు సంబంధించిన విద్యుత్ బిల్లులతో పాటు గతంలో పేరుకుపోయిన బకాయిలను కూడా మాఫీ చేసినట్లు ముఖ్యమంత్రి వెల్లడించారు. గ్రామీణ ప్రాంతాల్లో ప్రజలు ఎదుర్కొంటున్న సమస్యలను పరిష్కరించేందుకు ఇప్పటికే పలు పథకాలు అమల్లో ఉన్నాయని.. అవసరాన్ని బట్టి మరిన్ని పథకాలను తీసుకొస్తామని హామీ ఇచ్చారు.
కాగా నాగ్‌పూర్ జిల్లాలోని లోహరి సావంగా గ్రామంలో గురుదేవ్ సేవా మండలి ఆధ్వర్యంలో నిర్వహించిన ప్రార్థనా సమావేశం అనంతరం గ్రామస్థులతో ఫడ్నవీస్ మాట్లాడారు. ఈ ఏడాది రైతులకు ఎన్నో పరీక్షలు ఎదురయ్యాయని ఆయన పేర్కొన్నారు. సీజన్ చివరి వరకు ఆశించిన స్థాయిలో వర్షాలు కురవకపోవడంతో పంటలు దెబ్బతిన్నాయని, రైతులు భారీగా నష్టపోయారని వివరించారు. కొన్ని ప్రాంతాల్లో పశువులకు మేత కొరతతో పాటు తాగునీటి సమస్య కూడా తీవ్రంగా ఉందని ఆవేదన వ్యక్తం చేశారు.
గతంలో రుణమాఫీ.. ఇప్పుడు ఆర్థిక సాయం..
రైతులను ఆదుకోవడంలో ప్రభుత్వం వెనకడుగు వేయబోదని ముఖ్యమంత్రి స్పష్టం చేశారు. గతంలో తీసుకున్న రుణమాఫీ నిర్ణయంతో లక్షలాది మంది రైతులకు ప్రయోజనం చేకూరిందని గుర్తుచేశారు. ఆర్థిక ఇబ్బందుల నుంచి బయటపడేందుకు ఆ నిర్ణయం ఎంతో ఉపయోగపడిందన్నారు. అయితే ప్రస్తుత కరువు పరిస్థితులు మరోసారి రైతులను సంక్షోభంలోకి నెట్టాయని, అందుకే నేరుగా వారి ఖాతాల్లో నగదు జమ చేసే విధంగా చర్యలు చేపట్టామని తెలిపారు.
నీటి సమస్యకు శాశ్వత పరిష్కారం..
ఇక కరువు పరిస్థితులను ఎదుర్కోవడంలో తాత్కాలిక సాయం మాత్రమే సరిపోదని ప్రభుత్వం భావిస్తున్నట్టు తెలుస్తోంది. అందులో భాగంగానే రాష్ట్రవ్యాప్తంగా పెద్ద ఎత్తున నీటి సంరక్షణ పనులు చేపట్టనున్నట్లు ఫడ్నవీస్ ప్రకటించారు. వర్షపు నీటిని ఒడిసిపట్టడం, అందుబాటులో ఉన్న నీటి వనరులను సమర్థంగా వినియోగించుకోవడం వంటి అంశాలకు ప్రాధాన్యత ఇవ్వనున్నట్లు తెలిపారు. గ్రామీణ ప్రాంతాల్లో ప్రజలు ఎదుర్కొంటున్న ఆరోగ్య సమస్యలపైనా ప్రత్యేకంగా దృష్టి సారిస్తామని చెప్పారు.
రైతుల్లో ధైర్యం నింపేందుకే..
కష్టాల్లో ఉన్న రైతులకు ప్రభుత్వం అండగా ఉందనే నమ్మకం కల్పించడమే తమ పర్యటన ముఖ్య ఉద్దేశమని ఫడ్నవీస్ పేర్కొన్నారు. తాను, తన సహచరులు గ్రామానికి వచ్చి రైతులతో కలిసి దీపావళి వేడుకల్లో పాల్గొనాలని నిర్ణయించుకున్నట్లు చెప్పారు. సంక్షోభ సమయంలో రైతులకు ప్రభుత్వం తోడుగా ఉంటుందనే భరోసా కల్పించడం అవసరమని అభిప్రాయపడ్డారు.
ఈ సందర్భంగా రాష్ట్రసంత్ తుక్డోజీ మహారాజ్ బోధనలు, ఆయన రచించిన గ్రామగీత, భజనలను ఫడ్నవీస్ ప్రస్తావించారు. కష్టాల్లో ఉన్నప్పుడు ఆయన పాటలు, ఆలోచనలు మనిషికి కొత్త ధైర్యాన్ని ఇస్తాయని చెప్పారు. గ్రామగీతలోని సందేశాలను ఆచరణలో పెడితే గ్రామాలు అన్ని రంగాల్లో అభివృద్ధి చెందుతాయని అభిప్రాయపడ్డారు. కరువు సమయంలో ప్రజలు అనుసరించాల్సిన మార్గాలపై కూడా ఆయన బోధనలు ఎంతో స్ఫూర్తినిస్తాయని పేర్కొన్నారు.
మరిన్ని పథకాలపై రైతుల్లో ఆశలు..
ప్రస్తుత కరువు పరిస్థితుల నుంచి రైతులను గట్టెక్కించేందుకు ఆర్థిక సాయం, విద్యుత్ బిల్లుల మాఫీతో పాటు నీటి సంరక్షణ పనులను ప్రభుత్వం ముందుకు తీసుకెళ్తోంది. రానున్న రోజుల్లో మరిన్ని పథకాలు అందుబాటులోకి తీసుకొస్తామని ముఖ్యమంత్రి ఇచ్చిన హామీతో రైతుల్లో కొత్త ఆశలు చిగురిస్తున్నాయి. అయితే ఈ పథకాలు క్షేత్రస్థాయిలో ఎంత వేగంగా అమలవుతాయన్నది ఇప్పుడు కీలకంగా మారింది.
Click it and Unblock the Notifications
Sign in with Google
