Viral Video: 3,400 ముద్దులు.. రూ.5,500 ఫైన్!

Viral Video: సోషల్ మీడియాలో లైకులు, కామెంట్లు, వ్యూస్, ఫాలోవర్ల కోసం ఈ కాలం యువత ఎంతటి విన్యాసాలకైనా వెనుకాడటం లేదు. విదేశాల్లో ట్రెండవుతున్న ఓ వైరల్ కాన్సెప్టును అనుసరించి.. మధ్యప్రదేశ్‌లోని గ్వాలియర్‌కు చెందిన ఆదిత్య సికర్వార్ అనే యువకుడు తన సొంత స్విఫ్ట్ కారును కిస్సింగ్ కారుగా మార్చేశాడు. ఆదిత్య ప్రియురాలు ఎర్రటి లిప్‌స్టిక్ సహాయంతో దాదాపు మూడున్నర నుంచి నాలుగు గంటల పాటు శ్రమించి కారు బాడీ అంతటా ఏకంగా 3,400 ముద్దుల గుర్తులను ముద్రించింది. అనంతరం ఆ కారుతో నగరంలో తిరుగుతూ తీసిన వీడియో ఇన్‌స్టాగ్రామ్‌లో ఒక్కరోజులోనే 55 లక్షలకు పైగా వ్యూస్ సాధించి తీవ్ర సంచలనం సృష్టించింది.

అయితే ఈ కిస్సింగ్ కారుతో ఆదిత్య సికర్వార్ గ్వాలియర్ సిటీ సెంటర్ నుంచి థాటిపూర్ ప్రాంతం వరకు ప్రయాణిస్తున్న సమయంలో రోడ్డుపై వెళ్లే వాహనదారులు, పాదచారుల దృష్టి అంతా ఆ కారుపైనే పడింది. అందరూ వాహనాలు ఆపి మరీ కారును ఆశ్చర్యంగా చూడటంతో ఆయా ప్రాంతాల్లో ట్రాఫిక్ జామ్ ఏర్పడటంతో సాధారణ ప్రజలకు అంతరాయం కలిగింది. రోడ్డుపై ప్రజల ఏకాగ్రతను దెబ్బతీస్తూ.. ట్రాఫిక్ నిబంధనలను ఉల్లంఘించేలా ఈ కారు ప్రయాణం సాగడంతో గ్వాలియర్ ట్రాఫిక్ పోలీసులు వెంటనే రంగంలోకి దిగారు.

వైరల్ వీడియోలోని కారు నంబర్ ప్లేట్ ఆధారంగా పోలీసులు థాటిపూర్ ప్రాంతంలో వాహనాన్ని కనుగొని దానిని స్వాధీనం చేసుకున్నారు. ట్రాఫిక్ సుబేదార్ అభిషేక్ రఘువంశీ వెల్లడించిన వివరాల ప్రకారం.. రోడ్డుపై ఇతరులకు ప్రమాదకరంగా మారేలా, ట్రాఫిక్ నియమాలను తుంగలో తొక్కి వాహనం నడిపినందుకు గానూ మోటార్ వెహికల్ యాక్ట్ కింద ఆదిత్యకు రూ.5,500 జరిమానాను విధించడమే కాకుండా.. కారుపై ఉన్న గుర్తులన్నింటిని తన సొంత చేతులతో రుద్ది మరీ కడిగించారు.

పోలీసుల వార్నింగ్, జరిమానా దెబ్బతో ఆ యువకుడు తన తప్పును అంగీకరించాడు. రీల్స్ పిచ్చిలో పడి తాను ట్రాఫిక్ నిబంధనలను ఉల్లంఘించినట్లు ఒప్పుకున్నాడు. సోషల్ మీడియా ఫేమ్ కోసం రోడ్డు భద్రతను పణంగా పెడితే చట్టపరమైన చర్యలు తీవ్రంగా ఉంటాయని ఈ ఘటన మరోసారి రుజువు చేసింది.

😂💋 LOVE GOT OUT OF HAND IN GWALIOR!

A young man’s girlfriend reportedly left around 3,400 kiss marks all over his car in just 3.5 hours.

Police stopped the unusual-looking vehicle, issued a ₹5,500 challan — and then made the man clean every single mark off the car! 😂 pic.twitter.com/0pukm0590r

— Kailash Vashi (@KailashVashi) August 25, 2026

English summary

Gwalior Kissing Car Viral Video, youth turned his Swift car into a 'Kissing Car' with 3,400 lipstick marks for Instagram reels. Traffic police fined him Rs 5,500 for violating traffic rules.