హిండెన్ బెర్గ్ దెబ్బకు ఫోర్బ్స్.. బ్లూమ్‌బెర్గ్.. ప్రపంచ కుబేరుల జాబితాలో టాప్ 25 నుండి అదానీ ఔట్!!

ఫోర్బ్స్ ప్రపంచ సంపన్నుల జాబితా టాప్ 25 నుండి గౌతమ్ అదానీ నిష్క్రమించారు. అదానీ బ్లూమ్‌బెర్గ్ కుబేరుల జాబితా, ఫోర్బ్స్ జాబితాలలో దారుణమైన స్థానాలకు పడిపోయారు.

ప్రపంచ కుబేరుల జాబితాలో 25 స్థానాల నుండి కూడా దిగువకు పడిపోయారు అదానీ గ్రూప్స్ అధినేత గౌతమ్ అదానీ. పోర్బ్స్ మరియు బ్లూమ్ బెర్గ్ సూచీల ప్రకారం ఫిబ్రవరి 22వ తేదీన ఆదాని గ్రూప్ చైర్మన్ గౌతమ్ అదానీ నికర ఆస్తుల విలువ 43.4 బిలియన్ల డాలర్ల కంటే తక్కువకు పడిపోవడంతో ఆయన ప్రపంచంలోని 25 మంది సంపన్న బిలియనీర్ల జాబితా నుండి కిందికి పడిపోయారు.

హిండెన్ బెర్గ్ ఎఫెక్ట్ .. కుప్పకూలిన అదానీ సామ్రాజ్యం

యూఎస్ కు చెందిన షార్ట్ సెల్లర్ హిండెన్ బర్గ్ రీసెర్చ్ అదానీ గ్రూప్ స్టాక్ మార్కెట్లో మ్యానిప్యులేషన్, అకౌంటింగ్ మోసాలకు పాల్పడుతుందని నివేదిక వెల్లడించిన తర్వాత గౌతమ్ అదానీ చిక్కుల్లో పడ్డారు. ఒకసారిగా అదానీ గ్రూప్ షేర్లన్నీ కుప్పకూలిపోవడం మొదలయ్యాయి. దీంతో అదానీ సంపద కొద్దిరోజులు వ్యవధిలోనే ఆవిరైపోయింది.

ఫోర్బ్స్ జాబితాలో 26కు పడిపోయిన అదానీ

హిండెన్ బెర్గ్ నివేదిక రాకముందు ఆసియాలో అత్యంత సంపన్నుడు, ప్రపంచంలోనే మూడవ అత్యంత సంపన్నుడుగా గౌతమ్ అదాని ఫోర్స్ జాబితాలో ఉన్నారు. కానీ ఇప్పుడు ఫోర్బ్స్ జాబితా ప్రకారం ఆయన వ్యక్తిగత నికర ఆస్తులు విలువ పడిపోయి 26వ స్థానానికి దిగజారారు. బుధవారం నాడు అదాని గ్రూప్ స్టాక్స్ మరోమారు పతనాన్ని చవి చూశాయి. దీంతో ఆయన వ్యక్తిగత నికర విలువ 3.6 బిలియన్లు ఆవిరి అయిపోయాయి. ప్రస్తుతం అదాని 26వ స్థానంలో నిలువగా, నైక్ యొక్క ఫీల్ నైట్ కుటుంబం 46.3 బిలియన్ల డాలర్ల నికర విలువతో 25వ స్థానంలో చేరింది.

బ్లూమ్ బెర్గ్ లో 29 స్థానానికి పతనమైన అదానీ

ఇక బ్లూమ్ బెర్గ్ ఇండెక్స్ లో కూడా గౌతమ్ అదానీ స్థానం పతనమైంది. బ్లూమ్ బెర్గ్ ప్రపంచ సంపన్నుల ఇండెక్స్ లో గౌతమ్ అదాని 29వ స్థానానికి పడిపోయారు. బ్లూమ్ బెర్గ్ ఇండెక్స్ లో అదానీ కంటే ముందు ఇటలీకి చెందిన గయోవన్ని ఫెర్రెరో 42.9 బిలియన్ డాలర్లతో ఉన్నారు. 121 బిలియన్ డాలర్ల నికర విలువతో 2023 సంవత్సరాన్ని ప్రారంభించిన గౌతమ్ అదాని ప్రపంచంలోనే మూడవ అత్యంత సంపన్నమైన వ్యక్తిగా, అపర కుబేరుడుగా గుర్తింపు పొందారు. టెస్లా మరియు స్పేస్ ఎక్స్ సీఈవో ఎలాన్ మస్క్ ను అధిగమించి మొదటి రెండు స్థానాలలోకి అడుగుపెడతాడని ఊహించారు. కానీ హిండెన్ నివేదిక అదానీ సామ్రాజ్యాన్ని తలకిందులు చేసింది.

స్టాక్ మార్కెట్ లో అదానీ గ్రూప్ విలవిల .. సంపద ఆవిరి

హిండెన్ బెర్గ్ నివేదికను అదానీ ఖండించినప్పటికీ, చట్టపరమైన చర్య తీసుకుంటామని బెదిరించినప్పటికీ, ఇన్వెస్టర్లలో విశ్వాసం కలిగేలా అదానీ మాట్లాడినప్పటికీ అదానీ గ్రూప్ ఆఫ్ కంపెనీలు పతనాన్ని చూస్తున్నాయి. జనవరి 24వ తేదీ నుండి మార్కెట్ క్యాపిటలైజేషన్లో అదానీ గ్రూపు 135 బిలియన్ల డాలర్లకు పైగా నష్టాలను చవిచూసింది. అదానీ పోర్ట్స్, అదానీ గ్రీన్ ఎనర్జీ ,అదానీ పవర్ సహా అదానీ గ్రూప్ యొక్క పది కంపెనీల సంయుక్త విలువ ఈవారం ప్రారంభంలో 100 బిలియన్ డాలర్ల కంటే తక్కువకు పడిపోయింది. గౌతమ్ ఆదానీని ప్రపంచ కుబేరుల జాబితాలో టాప్ 25 స్థానాల నుండి కూడా క్రిందికి తోసేసింది.

English summary

Gautam Adani slipped from top 25 list of world's richest men by Bloomberg, Forbes. His net worth has evaporated due to the Hindenburg Report, which has pushed him down to 26th place on the Forbes list and 29th place on the Bloomberg list.