పహల్గాం పోలీసు అధికారిపై ప్రభుత్వం సంచలన నిర్ణయం..!

గత నెల 22న జమ్మూ కాశ్మీర్ లోని పహల్గాంలో జరిగిన ఉగ్రవాద దాడిలో 26 మంది ప్రాణాలు కోల్పోయిన ఘటన తర్వాత భారత్-పాకిస్తాన్ మధ్య ఉద్రిక్త పరిస్ధితులు నెలకొంటున్నాయి. ఈ దాడిపై ఎన్ఐఏ ఇప్పటికే కేసు నమోదు చేసి చురుగ్గా దర్యాప్తు జరుపుతోంది. ఈ దాడికి పాల్పడిన ఉగ్రవాదులు ఇప్పటికీ దొరకలేదు. ఈ నేపథ్యంలో ప్రభుత్వం ఇవాళ పహల్గాం శాంతిభద్రతలకు బాధ్యుడైన స్టేషన్ హౌస్ ఆఫీసర్ పై కీలక నిర్ణయం తీసుకుంది.

జమ్మూ కాశ్మీర్‌లోని పహల్గామ్ పోలీస్ స్టేషన్ స్టేషన్ హౌస్ ఆఫీసర్ ను బదిలీ చేస్తూ ప్రభుత్వం కీలక నిర్ణయం తీసుకుంది. ఉగ్రదాడి జరిగిన 13 రోజుల తర్వాత ప్రభుత్వం ఈ నిర్ణయం తీసుకోవడం విశేషం. పహల్గాం స్టేషన్ హౌస్ ఆఫీసర్ గా పనిచేస్తున్న రియాజ్ అహ్మద్‌ను అనంతనాగ్‌కు బదిలీ చేశారు. అతని స్ధానంలో ఇన్‌స్పెక్టర్ పీర్ గుల్జార్ అహ్మద్‌ను పహల్గామ్ కొత్త ఎస్ హెచ్ వోగా నియమించినట్లు అధికారులు తెలిపారు.

జమ్మూకశ్మీర్లో జరిగిన ఉగ్రదాడి వెనుక నిఘా లోపాలతో పాటు శాంతి భద్రతల లోపాలు కూడా ఉన్నట్లు ఇప్పటికే పలు నివేదికలు స్పష్టం చేశాయి. అయినా ఇప్పటివరకూ పహల్గాం స్టేషన్ హౌస్ ఆఫీసర్ విషయంలో ప్రభుత్వం ఎలాంటి నిర్ణయం తీసుకోలేదు. కానీ ఇవాళ ఉన్నట్లుండి ఈ బదిలీ జరిగింది. తాజాగా కాశ్మీర్ కు చెందిన స్థానికులు కూడా ఉగ్రవాదులకు సహకరించి ఉండొచ్చన్న నివేదికలు వచ్చాయి. ఈ నేపథ్యంలో ప్రభుత్వం ఈ బదిలీ చేసినట్లు తెలుస్తోంది.

ఇప్పటికే ఉగ్రవాదుల కోసం తీవ్ర గాలింపు జరుపుతున్న భద్రతా దళాలు వారిని గుర్తించాయి. అయితే వీరిలో స్థానికులతో పాటు పాకిస్తానీ జాతీయులు ఇద్దరూ ఉన్నారు. కానీ దాడి జరిగిన 12 రోజుల తర్వాత కూడా వారు పరారీలోనే ఉన్నారు. వీరి కోసం భారీ ఎత్తున గాలింపు చర్యలు కొనసాగుతున్నాయి. జమ్మూ కాశ్మీర్ పోలీసులు పహల్గాంతో పాటు దక్షిణ కశ్మీర్ అంతా భారీ ఉగ్రవాద వ్యతిరేక ఆపరేషన్‌ను ప్రారంభించారు. ఇప్పటికే ఉగ్రవాదులు లేదా ఉగ్రవాద సానుభూతిపరులుగా అనుమానిస్తున్న పలువురుని అరెస్టు చేశారు.అయినా ఉగ్రవాదులు మాత్రం దొరకలేదు.