రిపబ్లిక్ డే పరేడ్ రిహార్సల్: ప్రత్యేకతలివే (ఫోటోలు)

By Nageswara Rao

Published: Monday, January 25, 2016, 19:21 [IST]

న్యూఢిల్లీ: భారతదేశం మంగళవారం (జనవరి 26)న 67వ రిపబ్లిక్ డే వేడుకలను అత్యంత ఘనంగా జరుపుకోనుంది. ఈ వేడుకలకు ముఖ్య అతిథిగా ఫ్రాన్స్ అధ్యక్షుడు ఫ్రాంకోయిస్ హోలాండె హాజరవుతున్నారు. ప్రతి ఏడాదిలాగే ఈ ఏడాది కూడా భారతదేశం భక్తి, శ్రద్ధలతో ఈ వేడుకను నిర్వహిస్తున్నారు.

ప్రతి ఏటా జనవరి 26న ఏముంటాయనేది ప్రతి సామాన్యూడి మదిలో మెదిలేప్రశ్న. త్రివిధ దళాల విన్యాసాలు.. జండా వందనాలు.. అధికారులు, పాలకుల ప్రసంగాలతో పాటు ఈ ఏడాది జరుగుతున్న వేడుకలకు చాలా ప్రత్యేకతలున్నాయి.

అవేంటంటే 1950 నుంచి ఇప్పటి వరకు ఏ రిపబ్లిక్ వేడుకల్లో విదేశీ సైనికులు ఎప్పుడూ పాల్గోలేదు. తొలిసారిగా ఫ్రాన్స్‌ ఆర్మీ మన వేడుకల్లో భారత ఆర్మీతో పాటు కవాతు చేయనుంది. ఇందుకోసం జనవరి 8 నుంచి ఎనిమిది రోజుల పాటు భారత సైన్యంతోపాటు వారు కూడా రిహార్సల్స్‌లో పాల్గొన్నారు.

సైనికులతో పాటు 26 ఏళ్ల తర్వాత తొలిసారిగా ఈ ఏడాది శునకాలకూ రాజ్‌పథ్‌లో కవాతు చేయనున్నాయి. అందుకోసం ఇప్పటికే ఆర్మీ అధికారులు జర్మన్‌షెపర్డ్‌, లెబ్రేడర్‌ జాతులకు చెందిన 1200 శునకాల నుంచి 36 శునకాల్ని ఎంపిక చేశారు.

పేలుడు పదార్థాల్ని సమర్థంగా గుర్తించడంతోపాటు ఎన్నో సందర్భాల్లో సైనికుల ప్రాణాల్ని కాపాడుతున్నందుకుగాను వాటికి ఈ సారి ఆ గౌరవాన్ని కల్పించారు. ప్రతిఏటా నిర్వహించే రిపబ్లిక్ డే వేడుకల సమయం కంటే ఈసారి సమయాన్ని కాస్త కుదించారు.

ఎప్పుడూ 115 నిమిషాలపాటు ఈ కార్యక్రమం జరిగితే ఇప్పుడు ఆ సమయాన్ని 90 నిమిషాలు మాత్రమే జరుగుతుంది. మరోవైపు రిపబ్లిక్ డే వేడుకల్లో అద్యంతం ఆకట్టుకునేవి బైక్‌లపై చేసే విన్యాసాలు. అయితే ఈసారి ఆ విన్యాసాలు చేసేది మహిళా సైనికులు.