లవ్ జిహాద్: షూటర్ తార భర్త అరెస్ట్, ట్రాన్సిట్ రిమాండ్

రాంచీ: జాతీయ షూటర్ తారా సహదేవ్ ఫిర్యాదు నేపథ్యంలో ఆమె భర్త ఆర్ఎస్ కోహ్లీ అలియాస్ రకిబుల్ హుస్సెన్‌ను పోలీసులు ఢిల్లీలో మంగళవారం రాత్రి అరెస్టు చేశారు. ఇన్స్‌పెక్టర్ జనరల్ ఆఫ్ పోలీసు అనురాగ్ గుప్త మాట్లాడుతూ.. ఢిల్లీ - ఘజీయాబాద్ బార్డర్‌లో అతనిని అరెస్టు చేసినట్లు తెలిపారు. అతనిని బుధవారం రాంచీకి తీసుకు వస్తామని చెప్పారు. రకిబల్ హుస్సేన్ నుండి ల్యాప్‌టాప్, కొంత మొత్తాన్ని స్వాధీనం చేసుకున్నట్లు తెలిపారు.

కాగా, కొత్తగా పెళ్లైన షూటర్ తారా సహదేవ్ ఇటీవల పోలీసులకు భర్త పైన ఫిర్యాదు చేసిన విషయం తెలిసిందే. తన భర్త తనను మోసగించి పెళ్లి చేసుకున్నాడని, పెళ్లయ్యాక తనను మరో మతంలోకి మారాలని వేధిస్తున్నారని ఫిర్యాదులో పేర్కొంది. ఈ నేపథ్యంలో పోలీసులు అతనిని అరెస్టు చేశారు.

ఆగస్టు 26న రాంచీ సూపరింటెండ్ ఆఫ్ పోలీసు అనూప్ బర్తారీ మాట్లాడుతూ.. నిందితుడితో తారా పెళ్లి జూలై 7న జరిగినట్లు చెప్పారు. తన భర్త తనను నిర్బంధించి వేధిస్తుండటంతో ఆగస్టు 19న తన కుటుంబ సభ్యులకు టెక్స్ట్ ఎస్సెమ్మెస్ పంపించినట్లు తారా చెప్పారు.

కాగా, పోలీసులు రకిబుల్ హుస్సేన్‌‌కు చెందిన కార్లను, ఇంటిని సీజ్ చేశారు. కోహ్లీని అరెస్టు చేసేందుకు పోలీసులు నలుగురితో కూడిన ప్రత్యేక టీంను ఏర్పాటు చేశారు. పోలీసులు అతని వద్ద దొరికిన ల్యాప్‌టాప్‌లోని విషయాలు తెలుసుకునే ప్రయత్నాలు చేస్తున్నారు. కాగా, న్యాయస్థానం రకిబుల్ హుస్సేన్‌ను మూడు రోజుల ట్రాన్సిట్ రిమాండుకు తరలించింది.

English summary

RS Kohli alias Rakilbul Hussain, facing charges of deceit, exploitation and torture lodged by his newly-married wife Tara Shahdeo, was arrested in Delhi on Tuesday night.