సోనూ సూద్‌కు అరుదైన గౌరవం -స్పైస్ జెట్ విమానంపై రక్షకుడి బొమ్మ -నాడు రిజర్వేషన్ లేని ప్రయాణం

గొప్పలు చెప్పుకునే రాజకీయ నేతలంతా సిగ్గుతో తలదించుకునేలా.. కేంద్ర, రాష్ట్రాల ప్రభుత్వాలన్నీ చేతులు ముడుచుకుని కూర్చోన్నా.. కరోనా కష్టకాలంలో దేశానికి తానున్నానంటూ ఆపద్భాదవుడిలా.. పేద, వలస కూలీలపాలిట రక్షకుడిగా సోనూ సూద్ చేసిన సేవలను సామాన్యులెవరూ మర్చిపోలేరు. కరోనా విలయం తర్వాత కూడా చేతిక ఎముక లేద‌న్న‌ట్టుగా వీలైనంతలో పేదలకు సాయం చేసుకుంటూ వెళుతున్నారు న‌టుడు సోనూసూద్. అలాంటి వ్యక్తికి..

కష్టకాలంలో సాటి మనిషికి సాయపడిన సోనూ సూద్ ను 'రక్షకుడు'గా అభివర్ణిస్తూ, ఆయన చేసిన సేవలకు గౌరవంగా దేశీయ విమానయాన సంస్థ స్పైస్ జెట్ బోయింగ్ 737 విమానం మీద సోనూ సూద్ బొమ్మను ముద్రించింది. సోనూ బొమ్మతో 'ఆప‌ద్భాంద‌వుడికి వందనం' అని రాసున్న విమానం తాలూకు ఫొటోలు వైరల్ గా మారాయి.

త‌న‌కు ద‌క్కిన అరుదైన గౌర‌వంపై సోనూసూద్ సైతం స్పందించారు. తన తల్లిదండ్రులు బతికుంటే ఈ దృశ్యాన్ని చూసి ఎంతో గర్వపడేవారని అన్నారు. అంతేకాదు, గతంలో రిజర్వేషన్ లేకుండా తాను చేసిన విమాన ప్రయాణాన్నీ ఆయన గుర్తు చేసుకున్నారు.

''గతంలో ఓసారి మొగా నుండి ముంబైకి రిజ‌ర్వేష‌న్ లేకుండా విమానంలో ప్రయాణించాను. ఇప్పుడు నాకు ఇలాంటి గుర్తింపు వ‌చ్చేలా చేసిన మీ అంద‌రికి ధ‌న్య‌వాదాలు. అమ్మానాన్నలను మరింత మిస్ అవుతున్నాను. ఇకమీదట కూడా నా పనిని కొనసాగిస్తాను'' అని సోనూ సూద్ ఓ ఎమోషనల్ ట్వీట్ చేశారు. సోనూ తల్లి సరోజ్ సూద్ 2007 లో చనిపోగా, తండ్రి శక్తి సూద్ 2016 లో మరణించారు. తండ్రి పేరుతో సోనూ ఓ ప్రొడక్షన్ హౌజ్ నడుపుతోన్న సంగతి తెలిసిందే.

English summary

Actor Sonu Sood remembered his parents in an emotional tweet in response to Indian airline SpiceJet's tribute to the actor. Sonu Sood, best known for playing antagonists in films, was hailed as a hero on social media for his successful efforts to send thousands of stranded migrants to their home villages during the lockdown and for flying back home stranded Indian students during the pandemic.