ప్రపంచంలోనే అత్యంత వేగవంతమైన చిరుతలివి, 70 ఏళ్ల తర్వాత భారత్‌లో అడుగుపెట్టాయి.

By Bbc Telugu

Updated: Saturday, September 17, 2022, 13:15 [IST]

భారత్‌లో 1952లో అంతరించిపోయాయని ప్రకటించిన తర్వాత దేశంలో తిరిగి చిరుతలు సంచరించనున్నాయి.

ప్రధాని నరేంద్ర మోదీ పుట్టిన రోజు సందర్భంగా నమీబియా నుంచి తీసుకొచ్చిన 8 పులులను శనివారం మధ్యప్రదేశ్‌లో ఉన్న కునో నేషనల్ పార్క్‌లో ప్రవేశపెట్టారు.

ఈ పులులు భారత్ లో అడుగు పెట్టిన తర్వాత నెల రోజుల పాటు ఈ నేషనల్ పార్క్‌లో ఏర్పాటు చేసిన ఎన్‌క్లోజర్‌లో క్వారంటైన్‌ చేస్తారు.

ఆ తర్వాత వాటిని జాతీయ పార్కులో విడిచిపెడతారు.

https://twitter.com/MIB_India/status/1571015694007021569

ఈ జాతి చిరుతలు గతంలో ఇతర సింహాలు, పులులతో కలిసి భారత్‌లో సంచరించేవి. కానీ, 70 ఏళ్ల క్రితం ఇవి అంతరించిపోయాయి.

గంటకు 113 కిలోమీటర్ల వేగంతో పరుగుపెట్టగలిగే ఈ చిరుత పులులు ప్రపంచంలోనే అత్యంత వేగవంతమైన జంతువులు.

ఇంత పెద్ద జంతువులను ఒక ఖండం నుంచి మరొక ఖండానికి తరలించి తిరిగి అడవిలోకి ప్రవేశపెట్టడం ప్రపంచంలో ఇదే మొదటిసారి.

మహారాష్ట్ర పులి పిల్లలు కూడా నరభక్షకులుగా మారతాయా?

దక్షిణ ఆఫ్రికా, నమీబియా నుంచి కనీసం 20 చిరుతలు భారత్‌కు రానున్నాయి. ప్రపంచంలో ఉన్న 7000 చిరుతల్లో మూడొంతులు ఈ దేశాల్లోనే ఉన్నాయి.

ఇందులో తొలి విడతగా 8 పులులు భారత్ కు వచ్చాయి. ఇందులో 5 ఆడ పులులు, మూడు మగ పులులు ఉన్నాయి. ఇవి 2 - 6ఏళ్ల వయసు మధ్య వయసు కలవి.

ఇవి నమీబియాలోని విండ్‌హూక్ నుంచి శనివారం గ్వాలియర్ చేరుకున్నాయి.

https://twitter.com/ANI/status/1570998871681302528

వీటితో పాటు వన్య ప్రాణ నిపుణులు, పశువైద్య నిపుణులు, ముగ్గురు బయాలజిస్టులు బోయింగ్ 747 విమానంలో వచ్చారు.

గ్వాలియర్ నుంచి ఈ పులులను హెలికాఫ్టర్‌లో మధ్యప్రదేశ్‌లోని కునో జాతీయ పార్కుకు తరలించారు. ప్రధానమంత్రి మోదీ వీటిని నేషనల్ పార్కులోకి విడుదల చేశారు.

https://twitter.com/ANI/status/1571016505537753089

చీతా: ఇండియాలో 50 ఏళ్ల కిందట అంతరించిపోయిన మృగం మళ్లీ వస్తోంది

భారత్‌కు తరలించే ముందు క్లినిక్‌లో ఉన్న చిరుత

289 చదరపు మైళ్ళ ప్రాంతం విస్తీర్ణంతో కూడిన కునో జాతీయ పార్కులో ఈ పులులకు ఆహారంగా జింకలు, అడవి పందులు కూడా ఉంటాయి.

చిరుతలను అడవిలోకి వదిలిపెట్టే ముందు వాటిని క్వారంటైన్‌లో ఉంచేందుకు విద్యుదీకరించిన కంచెలను ఏర్పాటు చేశారు.

చిరుతలను పర్యవేక్షించేందుకు, వాటి కదలికలను నియంత్రించేందుకు వాలంటీర్ల బృందాన్ని నియమించారు. ఇవి సంచరించే ప్రాంతాన్ని తెలుసుకునేందుకు ప్రతీ చిరుతకు శాటిలైట్ రేడియో కాలర్లను అమర్చారు.

ఆఫ్రికా చీతాలను తెచ్చి భారత్‌లో సింహాల మనుగడను ప్రమాదంలో పడేస్తున్నారా

భారతదేశంలో చిరుతలు మాయమవ్వడానికి వేట, జీవావరణ నష్టం, ఆహార కరువు కారణమయ్యాయి.

వలస పాలన సమయంలో గొర్రెల, పశువుల కాపర్లు కనీసం 200 చిరుతలను చంపినట్లు అధ్యయనాలు చెబుతున్నాయి.

కొన్నిటిని గ్రామాల్లోకి ప్రవేశించి పశుసంపదను నాశనం చేస్తుండటంతో వేటాడి కూడా చంపేశారు. భారతదేశం స్వతంత్రం సాధించిన తర్వాత ఇక్కడ అంతరించిపోయిన పెద్ద జంతువు చిరుత మాత్రమే.

భారత్ 1950ల నుంచి వీటిని తిరిగి దేశంలో ప్రవేశపెట్టాలని ప్రయత్నిస్తోంది. 1970లలో ఇరాన్ రాజు దేశం వదిలిపెట్టి వెళ్లిపోవడంతో ఇరాన్ నుంచి చిరుతలను తీసుకుని రావాలని చేసిన ప్రయత్నాలు కూడా విఫలమయ్యాయి.

ఈ చిరుతలు తిరిగి భారత్‌ కు తీసుకురావడం ద్వారా స్థానిక ఆర్ధిక వ్యవస్థలను బలోపేతం చేసి పెద్ద పులుల అభివృద్ధికి సహకరించే జీవావరణాలను పునరుద్ధరించే అవకాశం కలుగుతుందని ఈ ప్రాజెక్టును సమర్ధించే వారంటున్నారు.

కరోనావైరస్: వన్య ప్రాణుల్ని తినడం, వాటి అమ్మకాలు, కొనుగోళ్లు ఇకనైనా ఆగుతాయా?

కానీ, వీటిని తిరిగి ప్రవేశపెట్టడం వల్ల కొంత ముప్పు కూడా ఉందని కొందరు అంటున్నారు.

చిరుతలు చాలా సున్నితమైన జంతువులు. వీటికి పోరాట స్వభావం తక్కువగా ఉంటుంది.

దీంతో, వేటాడే ఇతర జంతువులకు ఇవి ఆహారంగా మారతాయి. కునో జాతీయ పార్కులో ఉన్న పెద్ద పులులు చిరుతలను చంపేయవచ్చు.

https://twitter.com/ANI/status/1570998871681302528

ఈ చిరుతలు సరిహద్దులు దాటి వెళ్ళినప్పుడు వేట లేదా ఇతర జంతువుల బారిన పడి చనిపోవచ్చు.

కానీ, ఈ భయాలకు ఆధారాలు లేవని అధికారులు అంటున్నారు.

చిరుతలు ఏ వాతావరణానికైనా వేగంగా అలవాటు పడతాయని చెబుతున్నారు.

ఆవాసానికి, వేటకు, మనిషి- జంతువుల మధ్య ఘర్షణకు సంబంధించిన అన్ని అంశాలను నిశితంగా పరిశీలించిన తర్వాతే కునో జాతీయ పార్కును ఎంపిక చేసినట్లు అధికారులు చెప్పారు.