యూపీలో మతఘర్షణలు, అరాచకానికి అలా కళ్లెం వేశా- ఓటర్లతో యోగీ ఆదిత్యనాథ్...

యూపీలో స్ధానిక సంస్ధల ఎన్నికల ప్రచారం జోరుగా సాగుతోంది. ఇప్పటికే తొలిదశ స్ధానిక సంస్ధల పోరు పూర్తి కాగా.. ఎల్లుండి రెండో దశ జరగనుంది. దీంతో సీఎం యోగీ ఆదిత్యనాథ్ స్వయంగా సుడిగాలి పర్యటనలు చేస్తున్నారు. ఇందులో తన పాలనతో చోటు చేసుకున్న ఎన్ కౌంటర్లు, హత్యలను కూడా తనకు అనుకూలంగా మార్చుకునేందుకు ప్రయత్నిస్తున్నారు. ఈ క్రమంలో రాష్ట్రంలో అరాచకాలకు తాను ఎలా ఫుల్ స్టాప్ పెట్టారో వివరిస్తున్నారు.

ఆగ్రాలోని ఎగ్జిబిషన్ గ్రౌండ్ లో జరిగిన ఎన్నికల ర్యాలీలో పాల్గొన్న యోగీ ఆదిత్యనాథ్.. రాష్ట్రంలో గత ప్రభుత్వాలు అలవాటు చేసిన మత ఘర్షణలు, అరాచకాలకు తాను అలీఘర్ లాక్ తో ఫుల్ స్టాప్ పెట్టినట్లు తెలిపారు. 2017కు ముందు రాష్ట్రంలో అధికారంలో ఉన్న ప్రభుత్వాలు కులం, బంధుప్రీతిని వాడుకుని రాజకీయాలు చేశాయని యోగీ ఆరోపించారు. ఈ కుల, బంధుప్రీతి పార్టీలతో రాష్ట్రంలో అభివృద్ధి కుంటు పడిందన్నారు.

బుజ్జగింపు రాజకీయాలతో గతంలో పార్టీలు అధికారంలోకి వచ్చాయని, వారు సమాజాన్ని చీల్చి రాజకీయంగా లబ్ది పొందారని యోగీ విమర్శించారు. తద్వారా సమాజంలో వర్గాల మధ్య అగాధం పెంచాయన్నారు. వీటి కారణంగా పండుగల సమయంలో సైతం ప్రజలు భయాందోళనలతో ఉండేవారన్నారు. గతంలో అలీఘర్ లో చోటు చేసుకున్న రాజకీయాల్ని దాటి ఇప్పుడు స్మార్ట్ సిటీ అవుతోందన్నారు.

రాష్ట్రంలో పిస్టోల్ సంస్కృతిని కూడా రూపుమాపామని, ఇప్పుడు ఎక్కడ చూసినా విద్యార్ధుల చేతుల్లో ట్యాబ్ లు కనిపిస్తున్నాయని సీఎం యోగీ ఆదిత్యనాథ్ ఓటర్లకు గుర్తుచేశారు. గతంలో మాఫియా బెదిరింపులతో భయంతో వణికిపోయిన వ్యాపారులు ఇప్పుడు స్వేచ్ఛగా రోడ్లపైకి వస్తున్నారని యోగీ తెలిపారు. అలీఘర్ లో ఎయిర్ పోర్టు నిర్మాణం కోసం ఎయిర్ పోర్ట్స్ అధారిటీ ఆఫ్ ఇండియాతో ఒప్పందం కుదుర్చుకున్నామని, ఇందుకోసం రూ.700 కోట్లు కూడా కేటాయించామన్నారు.

English summary

uttar pradesh cm yogi aditynath has said that he put aligarh lock on riots and anarchy in the state.