Xలో దూసుకుపోతున్న యోగీ ఆదిత్యనాథ్-ప్రధాని మోడీ తర్వాత రికార్డు..!

సోషల్ మీడియా మైక్రో బ్లాగింగ్ సైట్ ఎక్స్ (ట్విట్టర్)లో ఉత్తర్ ప్రదేశ్ సీఎం యోగీ ఆదిత్యనాథ్ దూసుకుపోతున్నారు. ఇప్పటికే కోట్లాది మంది ఫాలోయర్లు కలిగిన యోగీ ఆదిత్యనాథ్ ఎప్పటికప్పుడు ఆ సంఖ్యను పెంచుకుంటూ పోతున్నారు. యోగీకి యూపీతో పాటు దేశవ్యాప్తంగా పలు రాష్ట్రాల్లో పెరుగుతున్న ఆదరణకు ఇది నిదర్శనంగా నిలుస్తోంది. ఈ ఆదరణ ఏ స్ధాయిలో ఉందంటే మన దేశంలో ప్రధాని మోడీ తర్వాత అత్యధిక ప్రజాదరణ కలిగిన నేతగా ఆయన నిలుస్తున్నారు.

గత నెల రోజుల కాలంలో ట్విట్టర్ లో యోగీ ఆదిత్యనాథ్ ఫాలోయర్ల సంఖ్య అక్షరాలా 2.67 లక్షలు పెరిగింది. భారత దేశంలోని రాజకీయ నేతల్లో ఆయన కంటే ముందు కేవలం ప్రధాని మోడీ మాత్రమే ఉన్నారు. ఈ 30 రోజుల కాలంలో ప్రధాని మోడీకి 6.32 లక్షల ఫాలోయర్లు పెరిగారు. దీంతో మోడీ తర్వాత స్ధానంలో యోగీ నిలిచారు. మిగతా రంగాల వారిని మినహాయిస్తే ప్రధాని మోడీతో పోటాపోటీగా ఫాలోయర్లను పెంచుకుంటూ యోగీ ఆదిత్యనాథ్ ఎక్స్ లో సత్తా చాటుతున్నారు.

ట్విట్టర్ లో ఎప్పుడూ యాక్టివ్ గా ఉంటూ పోస్టులు పెట్టే యోగీ ఆదిత్యనాథ్ కు ముందు నుంచీ ఫాలోయర్ల సంఖ్య ఎక్కువగానే ఉంటోంది. దీంతో భారత్ రాహుల్ గాంధీ సహా ఎందరో భారతీయ రాజకీయ నేతల కంటే యోగీ ట్విట్టర్ లో ఎంతో ముందుంటున్నారు. అలాగే యోగీకి ఆదరణ కూడా వేగంగా పెరుగుతోందని కూడా యూపీ ప్రభుత్వ వర్గాలు చెప్తున్నాయి. ప్రస్తుతం యోగీ ఆదిత్యనాథ్ కు ఎక్స్ లో ఫాలోయర్లు 26 మిలియన్లు అంటే 2.6 కోట్ల మంది ఫాలోయర్లు ఉన్నారు.

అలాగే అన్ని రంగాలను కలుపుకుని భారతీయుల జాబితా తీస్తే అందులోనూ యోగీ చాలా ముందున్నారు. ఈ జాబితాలో యోగీ ఆదిత్యనాథ్ కంటే ముందు భారత అంతరిక్ష సంస్ధ ఇస్రో, ప్రధాని నరేంద్ర మోడీ, క్రికెటర్ విరాట్ కొహ్లీ మాత్రమే ఉన్నారు. వీరి తర్వాత యోగీ ఆదిత్యనాథ్ నాలుగో స్ధానంలో ఉన్నారు. అసలే వచ్చే ఏడాది ఎన్నికల తర్వాత యోగీ ఆదిత్యనాథ్ ప్రధాని మోడీకి పోటీదారుగా మారతారన్న ప్రచారం జరుగుతున్న నేపథ్యంలో ఆయనకు పెరుగుతున్న ఆదరణ బీజేపీ అగ్రనేతలకు కూడా షాకులిస్తోంది.

English summary

uttar pradesh cm yogi adityanath got record followers in X (twitter) after PM modi in last 30 days.