అఫ్గానిస్తాన్: ఇంటింటినీ జల్లెడ పడుతున్న తాలిబాన్

By Bbc Telugu

Updated: Friday, August 20, 2021, 20:49 [IST]

నాటో దళాలు లేదా అఫ్గానిస్తాన్ ప్రభుత్వం కోసం పని చేసిన వారి కోసం తాలిబాన్ వెతుకులాటను ఉధృతం చేసిందని ఐక్యరాజ్యసమితి రిపోర్టు హెచ్చరించింది.

వారి కోసం మిలిటెంట్లు ఇంటింటినీ జల్లెడ పడుతున్నారని, కుటుంబ సభ్యులను బెదిరిస్తున్నారని చెప్పింది.

అధికారాన్ని హస్తగతం చేసుకున్న తర్వాత ప్రజలపై 'ప్రతీకారం' తీర్చుకోబోమని తాలిబాన్ భరోసా ఇచ్చే ప్రయత్నం చేస్తోంది.

కానీ, 1990ల నాటి క్రూరత్వం వారిలో ఇంకా ఉందనే భయాందోళనలు నెలకొన్నాయి.

'సహకారం అందించిన వారు' లక్ష్యంగా తాలిబాన్ కదలికలు ఉన్నాయని ఐక్యరాజ్యసమితికి ఇంటెలిజెన్స్ అందించే ఆర్‌హెచ్ఐపీటీవో నార్వేయిన్ సెంటర్ ఫర్ గ్లోబల్ అనాలిసిస్ హెచ్చరించింది.

'తాలిబాన్ లక్ష్యంగా చేసుకున్న వారి సంఖ్య ఎక్కువగా ఉందని, వారందరికీ ముప్పు పొంచివుందని' రిపోర్టు రూపకల్పన చేసిన టీమ్‌ను నడిపిన క్రిస్టియన్ నెల్లేమన్ బీబీసీకి చెప్పారు.

'వారు లొంగకపోతే, వారి కుటుంబ సభ్యులను అరెస్టు చేసి, విచారించి, శిక్షించాలని భావిస్తున్నారు' అని వివరించారు.

తాలిబాన్ బ్లాక్ లిస్టులో ఉన్న వారందరూ పెనుప్రమాదంలో ఉన్నట్లేనని హెచ్చరించారు. పెద్ద ఎత్తున ఉరి శిక్షలు విధించే అవకాశాలు ఉన్నాయని పేర్కొన్నారు.

ఇతర పరిణామాలు:

ఇతర నగరాల్లో తాలిబాన్ కు వ్యతిరేకంగా నినాదాలు చేశారు. రాజధాని కాబుల్లో జాతీయ జెండాను ఊపుతూ కనిపించారు. అసాదాబాద్లో నిరసనకారులు గాయాలపాలయ్యారు.

కాబుల్ విమానాశ్రయం నుంచి బయల్దేరిన అమెరికా విమానాన్ని పట్టుకుని జారి పడిపోయి మరణించిన వ్యక్తిని జాకీ అన్వారీ(19)గా గుర్తించారు. అతను అఫ్గానిస్తాన్ జాతీయ ఫుట్‌బాల్ టీమ్‌లో ఆటగాడని తెలిసింది.

ఇతర దేశాలు తమ వారిని అఫ్గానిస్తాన్ దాటించే ప్రయత్నాలు చేస్తూనే ఉన్నాయి. ఆగస్టు 14 నుంచి 7 వేల మందిని రక్షించామని అమెరికా వెల్లడించింది.

కాబూల్ విమానాశ్రయం వెలుపల పరిస్థితి గందరగోళంగానే ఉంది. పారిపోయేందుకు ప్రయత్నిస్తున్న అఫ్గానీయులను తాలిబాన్ అడ్డుకుంటోంది. ఓ వీడియోలో పిల్లవాడిని అమెరికన్ సైనికుడికి అప్పగిస్తోన్న దృశ్యం కనిపించింది.

అమెరికాకు చెందిన వేలాది ఆయుధాలతో కూడిన వాహనాలు ప్రస్తుతం తాలిబాన్ చేతిలో ఉన్నాయి. 30 నుంచి 40 విమానాలు, పెద్ద సంఖ్యలో చిన్న ఆయుధాలను వారు స్వాధీనం చేసుకున్నారని అమెరికా అధికారులు రాయిటర్స్‌తో చెప్పారు.

విదేశీ బలగాల ఉపసంహరణతో తాలిబాన్ ఆదివారం అఫ్గానిస్తాన్‌ను తన ఆధీనంలోకి తెచ్చుకుంది. దీంతో 20 ఏళ్ల తర్వాత వారికి మళ్లీ అధికారం చేజిక్కినట్లు అయింది. అప్పట్లో ప్రజలను తీవ్రంగా హింసించింది. బహిరంగంగానే ఉరి శిక్షలు అమలు పర్చేది. మహిళలు పని చేయడంపై నిషేధం ఉండేది.

ఎగురుతున్న విమానం ఎక్కి దేశం దాటాలనే ప్రయత్నంలో అఫ్గాన్ ఫుట్‌బాల్ ఆటగాడి మృతి

కానీ అధికారాన్ని హస్తగతం చేసుకున్న తర్వాత తొలి ప్రెస్ మీట్లో ఇస్లామిక్ చట్టాలకు కట్టుబడి ఉంటూ మహిళలకు పని చేసుకునే అవకాశం కల్పిస్తామని తాలిబాన్ పేర్కొంది. బుర్ఖా ధరించాలని బలవంతం చేయబోమని తెలిపింది. అయితే హిజాబ్‌ను కచ్చితంగా వేసుకోవాల్సివుంటుందని స్పష్టం చేసింది.

'అంతర్గత లేదా బాహ్య శత్రువులను' తాము కోరుకోవడం లేదని, భద్రతా దళాల మాజీ సభ్యులకు, విదేశీ శక్తులతో కలిసి పని చేసిన వారికి క్షమాభిక్ష ఉంటుందని కూడా వెల్లడించారు.

ఈ మాటలను అంతర్జాతీయ సమాజంతో సహా అఫ్గానీయులు కూడా నమ్మడం లేదు.

ఐక్యరాజ్యసమితి చీఫ్ ఆంటోనియో గుటెర్రెస్ మాట్లాడుతూ, అంతర్జాతీయ గుర్తింపు కోసం తాలిబాన్‌ తాపత్రయ పడుతోందని పేర్కొన్నారు.

తాలిబాన్ మారారని అనుకుంటున్నారా అని ఓ ఇంటర్వ్యూలో అడిగిన ప్రశ్నకు 'లేదు' అని అమెరికా అధ్యక్షుడు జో బిడెన్ పేర్కొన్నారు. వారు 'అస్తిత్వం' కోసం చూస్తున్నారని చెప్పారు.