'తొలి మహిళా సూసైడ్ బాంబర్ కావాలని ఉంది'
లండన్: ఇస్లామిక్ స్టేట్ (ఐఎస్ఐఎస్) తొలి మహిళా సూసైడ్ బాంబర్ కావాలని ఉందని బ్రిటన్ కు చెందిన ఓ మహిళ సంచలన వ్యాఖ్యలు చేస్తున్నది. అమెరికా సైనిక దళాలు నా లక్ష్యం అంటూ సోషల్ మీడియాలో ప్రచారం చేస్తూ రెచ్చిపోతున్నది.
బ్రిటన్ కు చెందిన సాలీ జోన్స్ (46) గతంలో సిరియా పారిపోయి ఇస్లామిక్ స్టేట్ ఉగ్రవాదిని వివాహం చేసుకుంది. తరువాత అమెరికా జరిపిన వైమానిక దాడులలో అనేక మంది ఉగ్రవాదులతో పాటు సాలీ జోన్స్ భర్త మరణించాడు.
అప్పటి నుంచి తాను ఇస్లామిక్ స్టేట్ తొలి మహిళా సూసైడ్ బాంబర్ కావాలని లక్ష్యంగా పెట్టుకుంది. సోషల్ మీడియాను ఎక్కువగా ఉపయోగించే సాలీ జోన్స్ పదే పదే అమెరికాను ఈ రకంగా హెచ్చరిస్తూ పోస్ట్ చేస్తుంటుంది.
సాలీ జోన్స్ వలన భద్రతకు ముప్పు వాటిల్లుతుందని ఆందోళన చెందిన అమెరికా భద్రతా దళాలు ఈ మహిళా ఉగ్రవాది కోసం గాలిస్తున్నాయి. ఎలాగైనా సాలీ జోన్స్ ను గుర్తించాలని వేట ప్రారంభించారు.
డ్రోన్ లు ఉపయోగించి సాలీ జోన్స్ ను అంతం చెయ్యాలని అమెరికా బలగాలు భావిస్తున్నాయి. 2000లో చెచెన్యాలో హవా బరయెవ్ రష్యా దళాలపై ఆత్మాహుతి దాడికి పాల్పడింది. సాలీ జోన్స్ నిత్యం హవాను ప్రశంసిస్తుంటుందని బ్రిటీష్ మీడియా వెల్లడించింది. బ్రిటీష్ మీడియా ఈమెను మిసెస్ టెర్రర్ అనే పేరుతో పిలుస్తుంటుంది.