టిక్ టాక్‌కు లైఫ్

Donald Trump on Tik Tok: చైనాకు చెందిన వీడియో స్ట్రీమింగ్ ప్లాట్‌ఫామ్ టిక్ టాక్‌కు కొత్త జీవితాన్ని ప్రసాదించడానికి సిద్ధపడ్డారు అమెరికా అధ్యక్షుడు డొనాల్డ్ ట్రంప్. అధ్యక్షుడిగా ప్రమాణ స్వీకార సమయంలో ఇచ్చిన హామీని నిలబెట్టుకునే ప్రయత్నం చేస్తోన్నారు. ఈ క్రమంలో మరో కొత్త నిర్ణయాన్ని తీసుకున్నారు.

టిక్‌టాక్‌ను అమెరికా నిషేధించిన విషయం తెలిసిందే. దీనిపై ఆ యాప్ మాతృ సంస్థ బైట్ డాన్స్ న్యాయస్థానాన్ని ఆశ్రయించినప్పటికీ ఫలితం దక్కలేదు. ఈ నిషేధాన్ని అక్కడి న్యాయస్థానం సమర్థించింది కూడా. దీన్ని పునరుద్ధరిస్తానంటూ అప్పట్లో హామీ ఇచ్చారు డొనాల్డ్ ట్రంప్. టిక్ టాక్ ఈజ్ బ్యాక్ అంటూ అధ్యక్షుడిగా తొలి ప్రసంగంలోనే స్పష్టం చేశారు.

నిషేధాన్ని రద్దు చేసేలా చర్యలు తీసుకుంటానని హామీ ఇచ్చారు. ఈ యాప్‌ను విక్రయించడానికి బైట్‌డాన్స్‌కు మరింత గడువు ఇస్తానని పేర్కొన్నారు. దీనికి అనుగుణంగా చర్యలు సైతం తీసుకున్నారాయన. ఈ నిషేధాన్ని 90 రోజుల వరకు తాత్కాలికంగా రద్దు చేస్తూ ఉత్తర్వులు ఇచ్చారు.

ఇప్పటివరకు కూడా ఏ అమెరికన్ కంపెనీ కూడా బైట్‌డ్యాన్స్‌తో ఒప్పందాలు కుదుర్చుకోవడానికి ముందుకు రాలేదు. దీనితో ఈ గడువును తాజాగా పొడిగించారు ట్రంప్. ఈ డెడ్‌లైన్‌ను మరో 75 రోజుల పాటు పొడిగించినట్లు ప్రకటించారు. ఈ మేరకు తన సొంత సోషల్ మీడియా ప్లాట్‌ఫామ్ ట్రూత్‌పై దీనికి సంబంధించిన సమాచారాన్ని పోస్ట్ చేశారు. టిక్ టాక్‌ను కాపాడుకుంటామని వ్యాఖ్యానించారు.

అమెరికాలో టిక్ టాక్ మనుగడ సాగించాలంటే, ఆ దేశ కంపెనీలతో ఒప్పందాన్ని కుదుర్చుకోవాల్సి ఉంటుంది. యూఎస్ కంపెనీ జాయింట్ వెంచర్‌గా 50 శాతం వాటాను టిక్ టాక్ మాతృసంస్థలో కలిగి ఉంటుందని నిబంధనను పెట్టారు. గడువు ముగియబోతోన్న నేపథ్యంలో- దీన్ని మరో 75 రోజుల పాటు పొడిగించినట్లు వెల్లడించారు.

టిక్‌టాక్ యూఎస్ కార్యకలాపాలన్నీ కూడా చాలావరకు ఒరాకిల్ సర్వర్‌లలో ఉన్నాయనేది తెలిసిందే. ఈ కంపెనీ ఛైర్మన్ లారీ ఎల్లిసన్.. డొనాల్డ్ ట్రంప్‌కు ఆప్తుడని అక్కడి మీడియా వెల్లడించింది. గడువు పొడిగించడానికి ఇదీ ఓ కారణమై ఉండొచ్చని అభిప్రాయపడింది.

English summary

US President Donald Trump on Friday extended the deadline for TikTok to find a non-Chinese buyer or face a ban in the United States, allowing 75 more days to find a solution. టిక్ టాక్‌ కొనుగోలుపై విధించిన గడువును అమెరికా అధ్యక్షుడు డొనాల్డ్ ట్రంప్ 75 రోజుల పాటు పొడిగించారు.