ఎప్స్టీన్ ఫైల్స్లో భారతీయ యువతి? బయటపడ్డ షాకింగ్ నిజాలు!
అమెరికా వ్యాపారవేత్త, లైంగిక నేరస్థుడు జెఫ్రీ ఎప్స్టీన్ కేసులో తాజాగా విడుదలైన పత్రాలు అంతర్జాతీయ స్థాయిలో ప్రకంపనలు సృష్టిస్తున్నాయి. అమెరికా న్యాయశాఖ విడుదల చేసిన ఈ చారిత్రాత్మక 'ఎప్స్టీన్ ఫైల్స్'లో మొదటిసారిగా ఓ భారతీయ అమ్మాయి. బాధితురాలిగా ఉన్నట్లు వెల్లడైంది. ఎప్స్టీన్ లైంగిక నేరాల ప్రపంచంలోకి ఓ భారతీయ యువతిని కూడా బలవంతంగా నెట్టడం లేదా ఆమెను వేధించడం జరిగిందనే వార్త ఇప్పుడు ఇండియాలోనూ తీవ్ర చర్చకు దారితీస్తోంది.
ఈమెయిల్ ద్వారా బయటపడిన రహస్యం
ఈ షాకింగ్ విషయం దాదాపు ఆరేళ్ల క్రితం.. అంటే జనవరి 13, 2020న రాసిన ఓ ఈమెయిల్ ద్వారా వెలుగులోకి వచ్చింది. బాధితుల తరఫున న్యాయపోరాటం చేస్తున్న 'ఎడ్వర్డ్స్ పాటింగర్ LLC' లా సంస్థకు చెందిన లాయర్ బ్రిట్నీ హెండర్సన్, అమెరికా ప్రభుత్వ అధికారులకు ఒక మెయిల్ పంపారు. అందులో ఎప్స్టీన్ బారిన పడి తీవ్ర మానసిక క్షోభ అనుభవిస్తున్న బాధితులకు థెరపీ (మానసిక చికిత్స) అవసరమని కోరారు. ఆ జాబితాలోనే ఒక బాధితురాలు ప్రస్తుతం భారతదేశంలో నివసిస్తున్నారని ఆమె ప్రత్యేకంగా ప్రస్తావించారు.
ఆ బాధితురాలి కోసం అమెరికా అధికారుల ఆరా
సదరు ఈమెయిల్లో లాయర్ హెండర్సన్ అధికారులను ఒక కీలక ప్రశ్న అడిగారు. "ఒక బాధితురాలు ప్రస్తుతం భారత్లోనే ఉంది. అమెరికా ప్రభుత్వం ఆమెకు అక్కడ ఏమైనా సహాయం చేయగలదా? అమెరికాలో బాధితులకు ఇచ్చే ఉచిత థెరపీ సెషన్లు ఆమెకు ఇండియాలో అందుబాటులోకి వచ్చే అవకాశం ఉందా?" అని ప్రశ్నించారు. దీనికి స్పందించిన అమెరికా అధికారులు, బాధితులకు పరిహారం అందించేందుకు, వారి మానసిక ఆరోగ్యం కోసం అవసరమైన థెరపిస్ట్లను ఏర్పాటు చేసేందుకు సిద్ధంగా ఉన్నట్లు తెలిపారు. ఈ క్రమంలోనే ఆ భారతీయ యువతి వివరాలను సేకరించేందుకు అధికారులు ప్రయత్నాలు ప్రారంభించారు.
గుర్తు తెలియని ఆ భారతీయ యువతి ఎవరు?
అమెరికా ప్రభుత్వం ఈ ఫైల్స్ విడుదల చేసినప్పటికీ.. బాధితుల ప్రైవసీని దృష్టిలో ఉంచుకుని ఆ అమ్మాయి పేరును గోప్యంగా ఉంచింది. సాధారణంగా లైంగిక నేరాల కేసుల్లో బాధితుల గుర్తింపును బయటపెట్టరు. అయితే ఆ యువతి ఇప్పుడు ఇండియాలోనే ఉందనే వార్త సోషల్ మీడియాలో దావానంలా వ్యాపించింది. ఆమె ఎవరై ఉంటారు? ఎప్స్టీన్ నెట్వర్క్లో ఆమె ఎలా చిక్కుకుంది? అనే అంశాలపై నెటిజన్లు రకరకాల కహానీలు వినిపిస్తున్నారు. విదేశీ ప్రయాణాలు చేసినప్పుడు లేదా ఉన్నత వర్గాల నెట్వర్క్ ద్వారా ఆమె ఎప్స్టీన్ కబంధ హస్తాల్లో చిక్కి ఉండవచ్చని భావిస్తున్నారు.
ఎప్స్టీన్ చీకటి సామ్రాజ్యం - అసలేమిటి ఈ ఫైల్స్?
జెఫ్రీ ఎప్స్టీన్ అనే వ్యక్తి అమెరికాలో ఒకప్పుడు అత్యంత శక్తివంతుడైన ఫైనాన్షియర్. తనకున్న పలుకుబడితో ప్రపంచంలోని ప్రముఖ రాజకీయ నేతలు, వ్యాపారవేత్తలతో సంబంధాలు నెరిపేవాడు. ఈ ముసుగులో అతను మైనర్ బాలికల అక్రమ రవాణా, లైంగిక వేధింపుల నెట్వర్క్ను నడిపేవాడు. 2025లో అమెరికా కాంగ్రెస్ పాస్ చేసిన 'ఎప్స్టీన్ ఫైల్స్ ట్రాన్స్పరెన్సీ యాక్ట్' ద్వారా ఈ రహస్యాలన్నీ బయటకు వస్తున్నాయి. జనవరి 2026లో ఏకంగా 35 లక్షల పేజీల డాక్యుమెంట్లు, వేల సంఖ్యలో వీడియోలు, ఫోటోలు బహిరంగమయ్యాయి. ఇందులో భారతీయ కనెక్షన్ బయటపడటం ఈ కేసులో ఒక కొత్త మలుపుగా మారింది.
Click it and Unblock the Notifications
Sign in with Google