అమెరికాలో పట్టపగలు హిందూ ఆలయంపై దాడి..

అమెరికాలో దిగ్భ్రాంతికర ఘటన చోటు చేసుకుంది. ఒహియోలోని ఓ హిందూ దేవాలయంపై గుర్తుతెలియని వ్యక్తులు దాడికి పాల్పడ్డారు. రాళ్లు, ఇటుకలు విసిరారు. ఈ ఘటనలో ఆలయం కిటికీ అద్దాలు పగిలాయి. కాంపౌండ్ వాల్ దెబ్బతిన్నది. ఈ దాడి సమయంలో అర్చకులు, కొందరు భక్తులు ఆలయం లోపలే ఉన్నారు. ఈ ఘటన ఇప్పుడు అమెరికా, భారత్ తో పాటు ప్రపంచవ్యాప్తంగా ఉన్న హిందువుల్లో ఆగ్రహాన్ని, ఆందోళనను రేకెత్తిస్తోంది.

ఓహియో రిచ్‌మండ్ హైట్స్ లో ఉందీ ఆలయం. శ్రీ స్వామినారాయణ్ వడ్తాల్ ధామ్ ఆలయాన్ని లక్ష్యంగా చేసుకుని ఈ దాడులు జరిగాయి. దీనికి సంబంధించిన వివరాలను హిందూ అమెరికన్ ఫౌండేషన్ వెల్లడించింది. ఈ ఘోర దాడి స్థానిక కాలమానం ప్రకారం మధ్యాహ్నం సుమారు 1:30 గంటల సమయంలో చోటుచేసుకుంది. ఆ సమయంలో ఆలయ ప్రాంగణంలోనే పూజారులతో పాటు కొందరు భక్తులు పూజా కార్యక్రమాల్లో నిమగ్నమై ఉన్నారు.

దుండగులు విసిరిన ఇటుకల దాటికి కిటికీల అద్దాలు ముక్కలయ్యాయి. అదృష్టవశాత్తూ ఈ దాడుల్లో ఆలయం లోపల ఉన్న వారెవరికీ గాయాలు కాలేదని, అయినప్పటికీ.. భయాందోళనలకు గురయ్యారని హిందూ అమెరికన్ ఫౌండేషన్ వెల్లడించింది. సమాచారం అందిన వెంటనే రిచ్‌మండ్ హైట్స్ పోలీస్ యంత్రాంగం, ఓహియో స్టేట్ ఎఫ్‌బీఐ సివిల్ డివిజన్ అధికారులు సంఘటన స్థలానికి చేరుకున్నారు. పరిస్థితిని సమీక్షించారు.

ఆలయ ప్రాంగణంలో అమర్చిన సీసీటీవీ ఫుటేజీని స్వాధీనం చేసుకున్నారు. వాటిని నిశితంగా పరిశీలిస్తోన్నారు. నిందితులను త్వరితగతిన పట్టుకుంటామని అధికారులు తెలిపారు. ఆలయ నిర్వాహకులకు అవసరమైన పూర్తి సహాయ సహకారాలను అందిస్తోన్నామని హిందూ అమెరికన్ ఫౌండేషన్ స్పష్టం చేసింది. ఈ నెల 1 వ తేదీ నుంచి అమెరికా వ్యాప్తంగా హిందూ హెరిటేజ్ మంత్ ఉత్సవాలు ప్రారంభం అయ్యాయి. శరన్నవరాత్రి వేడుకల కోసం భక్తులు సిద్ధమవుతున్న తరుణంలోనే ఈ దుశ్చర్య జరగడం ప్రాధాన్యతను సంతరించుకుంది.

⚠️Hindu temple attacked in Ohio today| At 1:30 PM today, the Shree Swaminarayan Vadtal Dham Hindu Mandir in Richmond Heights, Ohio was attacked by perpetrator(s) who threw bricks at the temple causing significant damage.

Surveillance video is available and being reviewed by… pic.twitter.com/yruWaC7TnR

— Hindu American Foundation (@HinduAmerican) October 3, 2026

ఈ దాడిని కోయెల్షన్ ఆఫ్ హిందూస్ ఆఫ్ నార్త్ అమెరికా ఖండించింది. రిచ్‌మండ్ హైట్స్ మేయర్ కిమ్ థామస్‌, ఇతర అధికారులు ఈ వివక్షాపూరక దాడిపై తక్షణ చర్యలు తీసుకోవాలని డిమాండ్ చేసింది. అమెరికాలోని హిందూ సమాజంపై పెరుగుతున్న వ్యతిరేకత, ద్వేషపూరిత ప్రసంగాల నేపథ్యంలో ప్రజాప్రతినిధులు భద్రత చర్యలు చేపట్టాలని, హిందువులకు భరోసా ఇవ్వాల్సిన అవసరం ఉందని పేర్కొంది.

English summary

Hindu temple attacked in Richmond Heights Ohio threw bricks at the temple causing significant damage. The Hindu American Foundation call government agencies to publicly and unequivocally condemn hateful rhetoric against Indian and Hindu Americans.