రిషి సునాక్ సంచలనం: బ్రిటన్ ప్రధానిగా తొలి భారత సంతతి వ్యక్తి

లండన్: భారత సంతతికి చెందిన రిషి సునాక్ సంచలనం సృష్టించారు. లిజ్ ట్రస్ రాజీనామాతో బ్రిటన్ కొత్త ప్రధానిగా ఎవరిని ఎన్నుకుంటారోనన్న ఉత్కంఠకు తెరపడింది. బ్రిటన్ ప్రధానిగా భారత సంతతికి చెందిన రిషి సునాక్ ఎన్నికయ్యారు.

ఇటీవల లిజ్ ట్రస్ రాజీనామాతో నెలకొన్న సంక్షోభ పరిస్థితుల్లో జరిగిన పార్టీ అంతర్గత ఎన్నికల్లో టోరీ సభ్యులు ఈసారి రిషి సునాక్ వైపే మొగ్గు చూపారు. తమ దేశాన్ని సంక్షోభం నుంచి గట్టెక్కించగలరని విశ్వసించారు. దీంతో బ్రిటన్ పగ్గాలు చేపట్టే అరుదైన అవకాశం రిషి సునాక్ ను వరించింది.

నెలన్నర రోజుల క్రితం రేసులో ఉండి ఓటమిపాలైన సునాక్.. నేడు బ్రిటన్ ప్రధానిగా ఘన విజయం సాధించారు. అంతేగాక, బ్రిటన్ పాలనా పగ్గాలు చేపట్టిన తొలి భారత సంతతి వ్యక్తిగా రిషి సునాక్ అరుదైన రికార్డు సొంతం చేసుకున్నారు.

రిషి సునక్ సోమవారం కన్జర్వేటివ్ పార్టీ నాయకుడిగా ఎన్నికయ్యారు. ఇక, బ్రిటన్ తదుపరి ప్రధానమంత్రి కావడానికి సిద్ధంగా ఉన్నారు. సెప్టెంబరులో ప్రధానమంత్రి పదవికి జరిగిన రేసులో లిజ్ ట్రస్ చేతిలో ఓడిపోయిన భారతీయ సంతతికి చెందిన రిషి సునక్ ఈసారి ప్రధానమంత్రి రేసులో బలమైన పోటీదారుగా మారారు.

మాజీ ప్రధాని బోరిస్ జాన్సన్ రేసు నుంచి తప్పుకున్న తర్వాత.. రిషి సునాక్‌కు మార్గం మరింత సుగమమైంది. దీంతో రిషికి బలమైన ప్రత్యర్థి లేకపోవడంతో ఆయనే యూకే ప్రధానిగా ఎన్నికయ్యారు. ఆర్థిక సంక్షోభం కారణంగా ఎన్నికైన 45 రోజులకే లిజ్ ట్రస్ ప్రధానమంత్రి పదవికి రాజీనామా చేసిన విషయం తెలిసిందే.

English summary

Rishi Sunak, The First Indian-Origin PM Of Britain.