హైదరాబాదీలు ఈ పాలు తాగుతున్నారా? పాలకల్తీ పై అలెర్ట్!
మనం నిత్యం తాగే పాలు కూడా కల్తీ అవుతున్నాయి. రంగారెడ్డి జిల్లా ఇబ్రహీంపట్నం మండలం పోచారం గ్రామంలో ఓ ఇంట్లో నిశ్శబ్దంగా సాగుతున్న కల్తీ పాల తయారీ దందా బయటపడింది. హైదరాబాద్‌లోని వేలాది కుటుంబాలకు రోజూ పాలు సరఫరా అవుతున్నాయని చెప్పుకునే ఆ కేంద్రంపై మహేశ్వరం స్పెషల్ ఆపరేషన్స్ టీమ్ పోలీసులు శుక్రవారం ఉదయం మెరుపు దాడి చేశారు. దాడి సమయంలో పోలీసులు హైడ్రోజన్ పెరాక్సైడ్, ధోల్పూర్ పాలపొడి వంటి పదార్థాలను కలిపి కల్తీ పాలు తయారు చేస్తున్నట్లు గుర్తించారు.
పోచారానికి చెందిన పాల వ్యాపారి అండే శ్రీశైలం ఈ కేంద్రాన్ని నిర్వహిస్తున్నట్లు తేలింది. అతని ఇంట్లో దాడి చేసిన పోలీసులు సుమారు 100 లీటర్ల కల్తీ పాలు, ఒక లీటరు హైడ్రోజన్ పెరాక్సైడ్, ఒక్కో కిలో బరువున్న 35 ధోల్పూర్ పాలపొడి ప్యాకెట్లను స్వాధీనం చేసుకున్నారు. ఈ పాలు హైదరాబాద్‌లోని వివిధ ప్రాంతాల్లోని వినియోగదారులకు సరఫరా అవుతున్నట్లు పోలీసుల విచారణలో వెల్లడైంది. శ్రీశైలంను అదుపులోకి తీసుకుని కేసు నమోదు చేశారు.
మరిన్ని వివరాల కోసం విచారణ కొనసాగుతోంది.హైడ్రోజన్ పెరాక్సైడ్ అనేది సాధారణంగా బ్లీచింగ్, క్రిమినాశకాల్లో ఉపయోగించే రసాయనం. దీన్ని పాలలో కలిపితే పాలు చాలా రోజులు పాడవకుండా ఉంటాయని, రంగు తెల్లగా కనిపిస్తుందని కల్తీదారులు భావిస్తారు. కానీ ఇది మానవ ఆరోగ్యానికి చాలా ప్రమాదకరం. ఈ రసాయనం కడుపులోకి వెళ్లి జీర్ణాశయం, ప్రేగులపై ప్రభావం చూపుతుంది.
దీర్ఘకాలం తీసుకుంటే కాలేయం, మూత్రపిండాలపై ఒత్తిడి పెరుగుతుంది. పిల్లలు, వృద్ధులు, గర్భిణులు ఎక్కువగా ఈ కల్తీ పాల కారణంగా ప్రభావితమవుతారు. పాలపొడి కలపడం ద్వారా కూడా పోషక విలువలు తగ్గిపోయి, కేవలం పరిమాణం పెరుగుతుంది. తెలంగాణలో ఇటువంటి సంఘటనలు మళ్లీ మళ్లీ వెలుగులోకి వస్తూనే ఉన్నాయి. గత కొన్ని నెలల్లో హైదరాబాద్‌లోనూ, చుట్టుపక్కల జిల్లాల్లోనూ కల్తీ పన్నీరు, నెయ్యి, క్రీమ్, పాల ఉత్పత్తులపై పలు దాడులు జరిగాయి.
ఆహార భద్రతా శాఖ, పోలీసు బృందాలు కలిసి నిర్వహించిన తనిఖీల్లో వేల కిలోల కల్తీ పదార్థాలు స్వాధీనం అయ్యాయి. అయినా కల్తీదారులు కొత్త పద్ధతులతో మళ్లీ ప్రయత్నిస్తున్నారు. ప్రజలు తాగునీటి తర్వాత రోజూ ఎక్కువగా తీసుకునేది పాలే కాబట్టి ఈ దందాలు ప్రజల ఆరోగ్యంపై నేరుగా దాడి చేస్తున్నాయి. తాజా ఘటనల నేపధ్యంలో వినియోగదారులు జాగ్రత్తగా ఉండాల్సిన అవసరం ఉంది.
పాలు కొనేటప్పుడు లేబుల్, ఎక్స్‌పైరీ తేదీ, ప్యాకింగ్ పరిశీలించాలి. సాధారణంగా కల్తీ పాలు ఎక్కువగా నీళ్లు కలిసినట్టు కనిపిస్తాయి లేదా రుచి మారుతుంది. సాధ్యమైనంత వరకు నమ్మకమైన డెయిరీల నుంచి లేదా సర్టిఫైడ్ బ్రాండ్ల నుంచి కొనుగోలు చేయడం మంచిది. సందేహం వస్తే ఆహార భద్రతా శాఖకు ఫిర్యాదు చేయవచ్చు.
Click it and Unblock the Notifications
Sign in with Google
