కేసీఆర్ పార్టీకి మరో బిగ్ షాక్: కాంగ్రెస్ పార్టీలోకి ఎమ్మెల్యే తెల్లం వెంకట్రావు!

లోక్‌సభ ఎన్నికల ముందు బీఆర్ఎస్ పార్టీకి వరుస ఎదురుదెబ్బలు తగులుతున్నాయి. ఇప్పటికే పలువురు సిట్టింగ్ ఎంపీలు, ఎమ్మెల్యేలు పార్టీని వీడి ఇతర పార్టీల్లో చేరగా.. తాజాగా మరికొందరు కూడా పార్టీని వీడేందుకు సిద్ధమయ్యారు. తాజాగా, మహబూబాబాద్‌ లోక్‌సభ పరిధిలో కాంగ్రెస్‌ విజయాన్ని ఆకాంక్షిస్తూ మంత్రి తుమ్మల నాగేశ్వరరావు ఆధ్వర్యంలో ఇల్లందులో లోక్‌​సభ ఎన్నికల సన్నాహక సమావేశం జరిగింది.

అయితే, ఈ కార్యక్రమానికి హస్తం పార్టీ నాయకులు, కార్యకర్తలతోపాటు భద్రాచలం బీఆర్ఎస్(BRS) ఎమ్మెల్యే తెల్లం వెంకట్రావు(Tellam Venkata Rao) పాల్గొనటంతో రాజకీయంగా చర్చనీయాంశంగా మారుతోంది. దీంతో భద్రాచలం శాసన సభ్యుడు తెల్లం వెంకట్రావు కాంగ్రెస్ పార్టీలో చేరడం దాదాపు ఖాయమైనట్లుగానే తెలుస్తోంది.

బీఆర్ఎస్ ఎమ్మెల్యేగా గెలిచిన తెల్లం వెంకట్రావు కొంతకాలంగా సొంత పార్టీతో అంటీముట్టనట్టుగా వ్యహహరిస్తున్నారు. బీఆర్ఎస్ పార్టీ నిర్వహించిన ఛలో మేడిగడ్డ కార్యక్రమం, పార్లమెంట్‌ ఎన్నికల సన్నద్ధత సమావేశాలకు కూడా దూరంగా ఉన్నారు. అసెంబ్లీ ఎన్నికల్లో గెలిచిన తర్వాత మంత్రి పొంగులేటి శ్రీనివాస్‌రెడ్డితో కలిసి ముఖ్యమంత్రి రేవంత్‌రెడ్డితో భేటీ అయిన విషయం తెలిసిందే.

నాటి నుంచి తెల్లం కాంగ్రెస్ పార్టీకి దగ్గరవుతూ వచ్చారు. ఇటీవల మణుగూరు కాంగ్రెస్ బహిరంగ సభలో ముఖ్యమంత్రి రేవంత్ రెడ్డి ప్రసంగిస్తూ ఎమ్మెల్యే తెల్లం వెంకట్రావు తమతో కలిసి నడుస్తానంటూ వచ్చారని పేర్కొనడం గమనార్హం. ఈ క్రమంలో తెల్లం వెంకట్రావు కాంగ్రెస్‌లో చేరికకు ముహూర్తం ఖరారైందన్న ప్రచారం జోరుగా సాగుతోంది. ఏప్రిల్ 6న రంగారెడ్డి జిల్లా తుక్కుగూడ వేదికగా కాంగ్రెస్ లోక్​‌సభ ఎన్నికల శంఖారావ బహిరంగ సభ జరగనుంది.

ఈ సభకు కాంగ్రెస్ అగ్రనేత రాహుల్ గాంధీ హాజరుకానున్నారు. ఇక, ఈ సభలోనే రాహుల్ గాంధీ సమక్షంలో తెల్లం వెంకట్రావు కాంగ్రెస్ గూటికి చేరుతారని సమాచారం. ఇందు కోసం భద్రాచలం నుంచి తనతో పాటు పలువురు నాయకుల్ని తీసుకుని వెళ్లేందుకు తెల్లం ఏర్పాట్లు చేసుకుంటున్నట్లు తెలిసింది. లోక్‌సభ ఎన్నికల ముందు తెల్లం వెంకట్రావు కాంగ్రెస్‌లో చేరితే బీఆర్ఎస్​‌కు గట్టి ఎదురుదెబ్బ తగిలినట్లే.

English summary

BRS leader and Bhadrachalam MLA Tellam Venkata Rao likely To join Congress party soon.