ప్రేయసి కోసం.. గొంతుకోసి వారిని హతమార్చి.. బన్నీ ఘాతుకం!!

వరంగల్ జిల్లాలో దారుణ ఘటన చోటు చేసుకుంది. చెన్నారావుపేట మండలంలోని పాపయ్యపేట శివారు 16 చింతల తండాలో ఓ భార్య భర్తల జంటను గొంతు కోసి దారుణంగా హతమార్చిన ఘటన స్థానికంగా కలకలం రేపింది . మేకల నాగరాజు బన్నీ అనే యువకుడు తన భార్య దీపిక కుటుంబంపై విచక్షణ రహితంగా కత్తితో దాడి చేసి భార్య తల్లిదండ్రులను హతమార్చాడు.

ప్రేమవివాహం చేసుకున్న కూతురు.. తల్లిదండ్రులు ఏం చేశారంటే
ఈ ఘటనలో మృతుల కుమారుడు మదన్, కుమార్తె దీపికకు తీవ్ర గాయాలయ్యాయి. ప్రస్తుతం వీరిని ఎంజీఎం ఆస్పత్రికి తరలించి చికిత్స అందిస్తున్నారు. ఈ ఘటన వివరాల్లోకి వెళితే..16 చింతల తండాకు చెందిన దీపిక మహబూబాబాద్ కు చెందిన నాగరాజు అలియాస్ బన్నీ అనే యువకుడితో ప్రేమవివాహం చేసుకుంది. ఈ పెళ్లి ఇష్టం లేని యువతీ తల్లిదండ్రులు కొద్దిరోజులు క్రితం పెద్దమనుషుల సమక్షంలో పంచాయతీ పెట్టి తమ కుమార్తెను తమతో తీసుకెళ్లిపోయారు.

ప్రేయసిని దూరం చేశారని ఘాతుకం
తమ కుమార్తె జోలికి రావద్దని యువకుడిపైన పోలీసులకు కూడా ఫిర్యాదు చేశారు. అప్పటినుంచి వారి పైన ఆగ్రహంతో ఊగిపోతున్న బన్నీ నిన్న రాత్రి 16 చింతల తండాలోని తమ ఇంట్లో నిద్రిస్తున్న వాళ్లపైన దాడికి పాల్పడ్డాడు. తల్వార్ తో ఆ కుటుంబం పైన దాడికి పాల్పడిన బన్నీ యువతి తల్లిదండ్రుల గొంతు కోశాడు. దీంతో తల్లి సంఘటన స్థలంలోనే మృతి చెందగా, తండ్రిని ఆసుపత్రికి తరలిస్తున్న క్రమంలో మృతి చెందాడు.

ప్రేయసి, ఆమె సోదరుడి పరిస్థితి విషమం
దీపిక, ఆమె సోదరుడు మదన్ లపైన కూడా బన్నీ విచక్షణ రహితంగా దాడికి పాల్పడడంతో ప్రస్తుతం దీపికతో పాటు ఆమె సోదరుడు తీవ్ర గాయాలతో ఎంజీఎం ఆసుపత్రిలో చికిత్స పొందుతున్నారు. మొదటవారిని నర్సంపేట ఆసుపత్రికి తరలించినా, వారి పరిస్థితి విషమంగా ఉండడంతో మెరుగైన చికిత్స కోసం వరంగల్ ఎంజీఎం ఆసుపత్రిలో చేర్చారు. ప్రస్తుతం హత్యకు పాల్పడిన నాగరాజు అలియాస్ బన్నీ పరారీలో ఉన్నాడు.

బన్నీ కోసం పోలీసుల గాలింపు
బన్నీ కోసం పోలీసులు గాలింపు జరుపుతున్నారు. సంఘటన స్థలాన్ని పరిశీలించిన ఈస్ట్ జోన్ డిసిపి రవీందర్ హత్యకు పాల్పడిన నాగరాజును అదుపులోకి తీసుకుని చట్టపరమైన చర్యలు తీసుకుంటామని వెల్లడించారు. ఈ కేసులో దర్యాప్తును ముమ్మరం చేసినట్టుగా పేర్కొన్నారు.

English summary

bunny killed lover parents and attacked lover and her brother too.. warangal crime