రూ.10వేల కోట్ల పెట్టుబడులు అంచనా.. క్యాపెక్స్ సపోర్ట్ స్కీమ్‌కు క్యాబినెట్ ఆమోదం!
లిథియం, నికెల్ వంటి క్రిటికల్ మినరల్స్ ప్రాసెసింగ్ సామర్థ్యాన్ని పెంచేందుకు కేంద్రం మరో కీలక నిర్ణయం తీసుకుంది. రూ.2,814 కోట్ల అంచనా వ్యయంతో 'క్యాపెక్స్ సపోర్ట్ స్కీమ్ టు ప్రమోట్ క్రిటికల్ మినరల్ ప్రాసెసింగ్'కు కేంద్ర క్యాబినెట్ ఆమోదం తెలిపింది. ఈ పథకం ద్వారా రూ.10వేల కోట్ల పెట్టుబడులు రానున్నాయని తెలిపారు.
ప్రాసెసింగ్ యూనిట్ల నుంచి ఏటా రూ.25,000 కోట్ల విలువైన మినరల్స్ ఉత్పత్తి కావచ్చని కేంద్ర బొగ్గు, గనుల శాఖ మంత్రి కిషన్ రెడ్డి తెలిపారు.ఈ స్కీమ్ ఐదేళ్లపాటు 2026-27 నుంచి 2030-31 వరకు అమలులో ఉంటుంది. లిథియం, నికెల్ ఖనిజాలు, ఇంటర్మీడియట్ ఉత్పత్తులను అధిక స్వచ్ఛత కలిగిన కాంపౌండ్స్‌గా మార్చే నాలుగు ప్రాసెసింగ్ ప్లాంట్లు ఏర్పాటు చేయనున్నారు.
వీటిలో రెండు లిథియం ప్లాంట్లు ప్రతి ఒక్కటి కనీసం 30 వేల టన్నుల సామర్థ్యం కలిగి ఉన్నవి, రెండు నికెల్ ప్లాంట్లు ప్రతి ఒక్కటి కనీసం 50 వేల టన్నుల సామర్థ్యంకలిగి ఉన్నవి ఉంటాయి. నికెల్ ప్రాసెసింగ్ సమయంలో కోబాల్ట్ కూడా ఉప ఉత్పత్తిగా లభించే అవకాశం ఉంది.ప్రభుత్వం అర్హత కలిగిన పెట్టుబడిపై 30 శాతం క్యాపిటల్ సబ్సిడీ అందిస్తుంది. లిథియం ప్రాజెక్టులకు గరిష్ఠంగా రూ.500 కోట్లు, నికెల్ ప్రాజెక్టులకు రూ.900 కోట్లు వరకు సహాయం లభిస్తుంది.
లబ్ధిదారులను రెండు దశల్లో ఎంపిక చేస్తారు. మొదట సాంకేతిక అర్హత పరిశీలించి, ఆ తర్వాత తక్కువ సహాయం కోరే వారికి ప్రాధాన్యం ఇచ్చి ఎంపిక చేస్తారు. సబ్సిడీని ప్రాజెక్టు మైల్‌స్టోన్లు సాధించిన తర్వాత మూడు విడతలుగా విడుదల చేస్తారు. కిషన్ రెడ్డి మాటల్లో చెప్పాలంటే, ప్రస్తుతం భారత్ లిథియం, నికెల్, కోబాల్ట్ వంటి క్రిటికల్ మినరల్స్ కోసం ఎక్కువగా దిగుమతులపై ఆధారపడుతోంది.
2017-18లో లిథియం దిగుమతులకు రూ.6,500 కోట్లు ఖర్చు చేస్తే, ఇప్పుడు అది రూ.50,000 కోట్లకు పెరిగింది. ఈ భారాన్ని తగ్గించేందుకు, స్వదేశీ విలువ జోడింపు గొలుసును బలోపేతం చేసేందుకు ఈ పథకం కీలకం. అడ్వాన్స్‌డ్ కెమిస్ట్రీ సెల్ బ్యాటరీ ప్రోగ్రామ్, క్లీన్ ఎనర్జీ, బ్యాటరీ స్టోరేజ్ టార్గెట్స్, రేర్ ఎర్త్ పర్మనెంట్ మ్యాగ్నెట్ స్కీమ్, ఇండియా సెమీకండక్టర్ మిషన్ వంటి కార్యక్రమాలకు అవసరమైన ముడి పదార్థాలు దీని ద్వారా అందుతాయి.
ఆంధ్రప్రదేశ్, మహారాష్ట్ర, గుజరాత్, ఒడిశాల్లో ఇప్పటికే నాలుగు క్రిటికల్ మినరల్ ప్రాసెసింగ్ పార్కులు ఏర్పాటు చేస్తున్నారు. ప్రభుత్వ రంగ సంస్థ కేఏబీఐఎల్ ద్వారా అర్జెంటీనాలో లిథియం మైనింగ్ బ్లాకులు కొనుగోలు చేశారు. ఈ కొత్త స్కీమ్ వల్ల ఉపాధి అవకాశాలు పెరుగుతాయి, స్థానిక అనుబంధ పరిశ్రమలు అభివృద్ధి చెందుతాయి.
ఎలక్ట్రిక్ వాహనాలు, బ్యాటరీలు, ఎలక్ట్రానిక్స్, రక్షణ, స్పెషాలిటీ స్టీల్ వంటి రంగాలకు గట్టి మద్దతు లభిస్తుంది.మొత్తంగా చూస్తే, భారత్ క్రిటికల్ మినరల్స్ వ్యాల్యూ చైన్‌లో స్వయం సమృద్ధి సాధించే దిశగా మరో ముందడుగు వేసింది. ఈ పథకం ద్వారా దిగుమతుల భారం తగ్గి, స్వదేశీ ఉత్పత్తి పెరిగి, ఆర్థిక వ్యవస్థకు, ఉపాధికి మంచి ఫలితాలు రానున్నాయి.
Click it and Unblock the Notifications
Sign in with Google
