పాత దేవుడి పటాలు, విరిగిపోయిన దేవుడి విగ్రహాల విషయంలో GHMC వినూత్ననిర్ణయం
సహజంగా చాలా మంది ఇళ్ళలో భక్తితో పూజలు చేసిన దేవుళ్ళ ఫోటోలు, విగ్రహాలు విరిగిపోతే ఏం చేస్తారు కొందరైతే ఏ ఆలయాల దగ్గరనో పెడతారు. లేదా ఏదైనా కెనాల్ లో పడేస్తారు. మరికొందరు బాధ పడినా సరే చెత్తలో పడేస్తారు. అయితే హైదరాబాద్ నగరంలో పాత దేవుడి పటాలు, విరిగిన విగ్రహాల విసర్జన సమస్యకు భాగ్యనగర మున్సిపల్ కార్పొరేషన్ శాశ్వత మరియు గౌరవప్రదమైన పరిష్కారాన్ని కనుగొంది.
జీహెచ్ఎంసీ, ఇస్కాన్ కలిసి ఒక కీలక నిర్ణయం
సాధారణంగా భక్తులు తమ ఇళ్లలోని పాత దేవుడి చిత్రపటాలను నదులు, చెరువులు లేదా చెత్తకుప్పల్లో వేయడం వల్ల అవి మున్సిపల్ వ్యర్థాలతో కలిసి డంపింగ్ యార్డులకు చేరుకుంటున్నాయి. నిన్నటివరకు పూజలందుకున్న దైవస్వరూపాలు ఇలా చెత్తలో కలవడం భక్తుల మనోభావాలను దెబ్బతీస్తోంది. ఈ సమస్య నివారణకు జీహెచ్ఎంసీ కమిషనర్ ఆర్వీ కర్ణన్, బంజారాహిల్స్ ఇస్కాన్ ఆలయ యాజమాన్యంతో కలిసి ఒక వినూత్న రీసైక్లింగ్ కార్యక్రమానికి శ్రీకారం చుట్టారు.
బంజారాహిల్స్ రోడ్ నంబర్ 12లోని ఇస్కాన్ మందిరంలో పటాల సమర్పణ
ఈ కొత్త విధానం ప్రకారం, నగరవాసులు తమ వద్ద ఉన్న పాత దేవుడి పటాలు, విగ్రహాలను బంజారాహిల్స్ రోడ్ నంబర్ 12లోని ఇస్కాన్ మందిరంలో స్వచ్ఛందంగా అప్పగించవచ్చు. ఇందుకోసం భక్తులు ఆలయ వెబ్సైట్లో తమ వివరాలను నమోదు చేసుకోవాలి. సేకరించిన పటాలకు ప్రతిరోజూ ఉదయం 11 గంటల తర్వాత శాస్త్రోక్తంగా 'ఉద్వాసన పూజ' నిర్వహిస్తారు.
ఉద్వాసన పూజ చేసి భక్తి పూర్వక వీడ్కోలు
హిందూ సంప్రదాయం ప్రకారం ఈ పూజ చేయడం వల్ల ఆ పటాలలోని దైవత్వానికి ఎలాంటి అగౌరవం జరగకుండా భక్తిపూర్వకంగా వీడ్కోలు పలికినట్లవుతుంది. పూజ ముగిసిన తర్వాత పర్యావరణానికి హాని కలగకుండా వాటిని రీసైక్లింగ్ చేస్తారు. ఇస్కాన్ వాలంటీర్లు ప్రత్యేక పరికరాలతో పటాల నుండి చెక్క ఫ్రేములు, గాజు ముక్కలు మరియు కాగితాలను జాగ్రత్తగా వేరు చేస్తారు.
రీసైక్లింగ్ కు పటాలు, విరిగిపోయిన విగ్రహాలు
ఆపై వీటిని ఆయా రీసైక్లింగ్ పరిశ్రమలకు తరలిస్తారు. ప్రయోగాత్మకంగా ప్రారంభమైన ఈ పర్యావరణ-ఆధ్యాత్మిక విప్లవాన్ని జూన్ 13న యూసుఫ్గూడ హనుమాన్ మందిరంలో కూడా నిర్వహించనున్నారు. నగరంలో చెత్తను మూలం వద్దే వేరు చేయడం ద్వారా వ్యర్థాలను సంపదగా మార్చవచ్చని కమిషనర్ ఈ సందర్భంగా స్పష్టం చేశారు.
Click it and Unblock the Notifications
Sign in with Google