HYDRA : రూ.1200 కోట్ల భూమిని కాపాడిన హైడ్రా..

హైదరాబాద్ లోని Khanametలో ప్రభుత్వ భూములపై అక్రమ ఆక్రమణలను అరికట్టేందుకు HYDRAA మరోసారి కఠిన చర్యలు చేపట్టింది. నగరంలోని ఐటీ కారిడార్‌కు అత్యంత సమీపంలో ఉన్న ఈ ప్రదేశంలో భారీ విలువ కలిగిన భూమిని రక్షించేందుకు అధికారులు పెద్ద ఎత్తున ఆపరేషన్ నిర్వహించారు. ఖానామెట్ సర్వే నంబర్ 55లో అక్రమంగా ఆక్రమించబడిన సుమారు 8 ఎకరాల భూమిని స్వాధీనం చేసుకున్నారు. దీంతో ఈ వ్యవహారం చర్చనీయాంశంగా మారింది.

ఈ భూమి బహిరంగ మార్కెట్‌లో సుమారు రూ.1200 కోట్లకు పైగా విలువ ఉంటుందని ప్రాథమిక అంచనాలు సూచిస్తున్నాయి. ఇంత విలువైన ప్రభుత్వ భూమిపై కొంతకాలంగా కొన్ని రియల్ ఎస్టేట్, నిర్మాణ సంస్థలు ఆధిపత్యం చెలాయిస్తూ, తాత్కాలిక షెడ్లు, భారీ ఆర్‌సీసీ ప్లాంట్లు ఏర్పాటు చేసి కార్యకలాపాలు కొనసాగిస్తున్నాయి. దీంతో ఈ భూమి చుట్టూ అనుమానాస్పద లావాదేవీలు జరుగుతున్నట్లు అధికారులకు సమాచారం అందింది.

కాగా స్థానికుల ఫిర్యాదులు, ఇంటెలిజెన్స్ ఆధారంగా రంగంలోకి దిగిన HYDRAA బృందం, పోలీసుల భారీ బందోబస్తుతో కలిసి ఆకస్మికంగా ఆపరేషన్ ప్రారంభించింది. ఈ చర్యలో భాగంగా అక్కడ ఏర్పాటు చేసిన అన్ని అక్రమ నిర్మాణాలను బుల్డోజర్లతో కూల్చివేశారు. కార్మికుల కోసం ఏర్పాటు చేసిన షెడ్లను తొలగించడమే కాకుండా, నిర్మాణ సంస్థ చేతే అక్కడున్న ఆర్‌సీసీ ప్లాంట్‌ను పూర్తిగా తొలగింపజేశారు. అంతే కాకుండా ఆక్రమణలను తొలగించిన వెంటనే అధికారులు ఆ భూమి చుట్టూ ఫెన్సింగ్ ఏర్పాటు చేసి, అది ప్రభుత్వ భూమి అని తెలియజేస్తూ హెచ్చరిక బోర్డులను ఏర్పాటు చేశారు. భవిష్యత్తులో ఎవరైనా మళ్లీ ఆక్రమణలకు ప్రయత్నిస్తే కఠిన చర్యలు తీసుకుంటామని స్పష్టం చేశారు. ఈ ప్రాంతంలో ఇప్పటికే గతంలో కూడా ఇలాంటి చర్యలు చేపట్టినప్పటికీ, మళ్లీ ఆక్రమణలు జరగడం గమనార్హం.

అధికారులు తెలిపిన వివరాల ప్రకారం, ఈ భూమి అసైన్డ్ ల్యాండ్‌గా నమోదై ఉంది. అంతేకాకుండా ఇది ఇప్పటికే ప్రభుత్వ నిషేధిత జాబితా (Prohibited List)లో ఉండటంతో, ఎలాంటి కొనుగోలు, అమ్మకాలు చట్టబద్ధం కావని స్పష్టం చేశారు. ఈ సందర్భంగా HYDRAA అధికారులు రియల్ ఎస్టేట్ సంస్థలకు కఠిన హెచ్చరికలు జారీ చేశారు. ప్రభుత్వ భూములపై ఎలాంటి అక్రమ చర్యలు చేపట్టినా, ఎంతటి ప్రభావశీలులైనా వదిలిపెట్టే ప్రసక్తే లేదని స్పష్టం చేశారు. తప్పుడు క్లెయిమ్‌లు, నకిలీ డాక్యుమెంట్లతో ప్రభుత్వ భూములను ఆక్రమించేందుకు ప్రయత్నిస్తే చట్టపరమైన కఠిన చర్యలు తప్పవని తెలిపారు.

English summary

"Hydra" is cracking down on illegal constructions and encroachments in Hyderabad city. This team, formed with the aim of conserving ponds, is working super successfully.