Rayalaseema Express: రాయలసీమ ఎక్స్ ప్రెస్ కు హైదరాబాద్ లో కొత్త స్టాప్..!

హైదరాబాద్ లో ఐటీ ఉద్యోగాలు చేస్తున్న వారు తమ స్వస్థలాలకు వెళ్లేందుకు వీలుగా సమీపంలో ఉండే రైల్వే స్టేషన్లలో ప్రధాన రైళ్ల స్టాప్ ల కోసం ఎదురుచూస్తుంటారు. ఇలా పలు రైళ్లకు స్టాపుల కోసం దక్షిణ మధ్య రైల్వే దగ్గర డిమాండ్లు ఇప్పటికే పెండింగ్ లో ఉన్నాయి. వీటిలో ఒక డిమాండ్ కు తాజాగా మోక్షం కలిగింది. రాయలసీమ ఎక్స్ ప్రెస్ (rayalaseema express)కు హైదరాబాద్ లో ఇలాంటిదే ఓ స్టాప్ ఇస్తూ దక్షిణ మధ్య రైల్వే నిర్ణయం తీసుకుంది.

ఏపీలోని తిరుపతి నుంచి తెలంగాణలోని నిజామాబాద్ మధ్య రాకపోకలు సాగించే రాయలసీమ ఎక్స్ ప్రెస్ కు హైదరాబాద్ లో ఐటీ ఉద్యోగుల నుంచి చాలా డిమాండ్ ఉంది. ఇందులో భాగంగా బొల్లారం స్టేషన్ లో తమకు స్టాప్ కావాలని వారు ఎప్పటి నుంచో కోరుతున్నారు. దీంతో బొల్లారం స్టేషన్లో రాయలసీమ ఎక్స్ ప్రెస్ కు కొత్తగా ఒక నిమిషం పాటు హాల్ట్ ఇస్తూ అధికారులు నిర్ణయం తీసుకున్నారు. అదీ ఇవాళ్టి నుంచే అమల్లోకి వచ్చింది. దీంతో బొల్లారంలో రాయలసీమ ఎక్స్ ప్రెస్ ఎక్కే ఐటీ ఉద్యోగులకు ఊరట దక్కింది. తిరుపతి నుంచి నిజామాబాద్ వెళ్లే రైలు ఉదయం 6.19కు ఇక్కడకు వస్తుంది. అలాగే నిజామాబాద్ నుంచి వచ్చే రైలు సాయంత్రం 4.09కు వస్తుంది.

రాయలసీమ సూపర్ ఫాస్ట్ ఎక్స్‌ప్రెస్ (12793/12794) తిరుపతి నుండి నిజామాబాద్ మధ్య రోజూ రాకపోకలు సాగిస్తుంది. రాయలసీమ జిల్లాలైన చిత్తూరు,కడప,అనంతపురం,కర్నూలు మీదుగా వెళ్తూ తెలంగాణలోని హైదరాబాద్, నిజామాబాద్ ను ఇది కలుపుతుంది. 12793 నంబర్ రైలు తిరుపతి నుండి సాయంత్రం 5:30 గంటలకు బయలుదేరి, సికింద్రాబాద్ కు ఉదయం ఉదయం 6:15కి, నిజామాబాద్ కు 9:25కి చేరుతుంది. అలాగే 12794 నంబర్ రైలు నిజామాబాద్ లో మధ్యాహ్నం 2:15 కు బయలుదేరి తిరుపతికి మరుసటి రోజు ఉదయం 6:15కి చేరుకుంటుంది. దీనికి ఇప్పుడు బొల్లారంలో హల్ట్ ఇచ్చారు.