డబ్బుల కోసం సర్వీస్ గన్ తాకట్టు పెట్టిన ఎస్సై..!

హైదరాబాద్ అంబర్‌పేట్ పోలీస్ స్టేషన్‌లో అనూహ్య ఘటన చోటు చేసుకుంది. ఎస్సై భాను ప్రకాష్‌కు చెందిన సర్వీస్ తుపాకీ అదృశ్యం కావడం తీవ్ర సంచలనం రేపింది. అయితే ఈ ఘటన వెనుక ఉన్న అనుమానాస్పద విషయాలు వెలుగులోకి రావడంతో పోలీస్ శాఖలో పెద్ద ఎత్తున చర్చ జరుగుతోంది. దొంగతనం కేసు విచారణలో భాగంగా అసలు విషయం బయటికి రావడం.. డబ్బుల కోసమే సర్వీస్ గన్ ని తాకట్టు పెట్టారో ? లేదా అమ్మేశారో అనే అనుమానాలు హాట్ టాపిక్ గా మారాయి.

అసలేం జరిగిందంటే..?

జనవరిలో జరిగిన ఒక దొంగతనం కేసులో ఎస్సై భాను ప్రకాష్ స్వాధీనం చేసుకున్న బంగారం రికార్డుల్లో నమోదు కాలేదని పోలీసులు గుర్తించారు. ఈ నిర్లక్ష్యం బయట పడడం.. అదే సమయంలో అతని సర్వీస్ తుపాకీ కూడా కనిపించకపోవడంతో ఉన్నతాధికారులకు అనుమానం వచ్చింది. ఒకేసారి బంగారం, తుపాకీ రెండూ గల్లంతవడంతో ఇది కేవలం సాధారణ నిర్లక్ష్యం కాదని అధికారులు భావిస్తున్నారు.

తాకట్టు పెట్టారా ? - ఎస్సైపై అనుమానాలు

భాను ప్రకాష్ ఇటీవల ఆర్థిక సమస్యలు ఎదుర్కొంటున్నట్లుగా సహచరులు తెలిపారని సమాచారం. ఈ నేపథ్యంలో రికవరీ బంగారం, సర్వీస్ తుపాకీ రెండింటినీ తాకట్టు పెట్టి ఉండే అవకాశం ఉందని పోలీసులలో అనుమానాలు వ్యక్తమవుతున్నాయి. ప్రాథమిక విచారణలో భాను ప్రకాష్ స్పష్టమైన వివరణ ఇవ్వలేదని తెలుస్తోంది. అతని సమాధానాల్లో స్పష్టత లేకపోవడం.. వివరాలు దాచిపెట్టడం వంటి విషయాలు దర్యాప్తు అధికారుల అనుమానాలను మరింత బలపరిచాయి.

టాస్క్ ఫోర్స్ విచారణలో కీలక ప్రశ్నలు..

ఈ మేరకు టాస్క్ ఫోర్స్ అధికారులు ప్రస్తుతం ఎస్సై భాను ప్రకాష్‌ను లోతుగా విచారిస్తున్నారు. ప్రధానంగా బంగారం నిజంగా ఎంత స్వాధీనం చేశారు? బంగారాన్ని ఎందుకు రికార్డుల్లో నమోదు చేయలేదు? సర్వీస్ తుపాకీ ఎప్పుడు చివరిసారి అతని వద్ద ఉందని నిర్ధారణ? తాకట్టు దుకాణాల్లో CCTV ఫుటేజీలు, రికార్డులు పరిశీలించాలా? అతను ఆర్థిక ఇబ్బందుల్లో ఉన్నాడనే సమాచారం ఎంతవరకు నిజం? టాస్క్ ఫోర్స్ ఇప్పటికే పలు తాకట్టు దుకాణాల్లో విచారణ ప్రారంభించినట్లు తెలుస్తోంది.

ఈ ఘటన వెలుగులోకి రావడంతో పోలీసుల బాధ్యతారాహిత్యంపై ప్రజల్లో ఆగ్రహం వ్యక్తం అవుతోంది. కొద్ది రోజుల క్రితం ఓ కానిస్టేబుల్ మహిళపై అసభ్య ప్రవర్తన చూపిన కేసు వార్తల్లో నిలిచిన విషయం తెలిసిందే. ఇప్పుడు ఎస్సై సర్వీస్ తుపాకీ గల్లంతవడం పోలీసులపై విమర్శలకు తావిస్తోంది. ప్రజలు, సామాజిక సంస్థలు, న్యాయవర్గాలు పోలీస్ వ్యవస్థలో పారదర్శకత, బాధ్యత పెరగాలని డిమాండ్ చేస్తున్నారు.

చట్టపరంగా చూస్తే ఒక ఎస్సై సర్వీస్ ఆయుధాన్ని కోల్పోవడం కఠిన చర్యలకు దారి తీస్తుంది. భాను ప్రకాష్ నిర్లక్ష్యం, అబద్ధం, అక్రమ చర్యలు నిర్ధారణ అయితే సస్పెన్షన్, డిపార్ట్‌మెంటల్ కేసు, IPC ప్రకారం క్రిమినల్ కేసులు అతనిపై మోపే అవకాశం ఉంటుంది. ప్రస్తుతం కేసు దర్యాప్తు కొనసాగుతుండగా భాను ప్రకాష్ మొబైల్ డేటా, కాల్ రికార్డులు, బ్యాంక్ లావాదేవీలు, తాకట్టు దుకాణాల సీసీటీవీ ఫుటేజీలు పరిశీలిస్తున్నారు.

English summary

An unexpected incident took place at Amberpet Police Station in Hyderabad. The disappearance of the service pistol belonging to Sub-Inspector Bhanu Prakash has created a sensation.