అటవీ సంరక్షణలో విశిష్ట సేవలకు నగదు ప్రోత్సాహకాలతో అవార్డులు.. అమల్లోకి ఉత్తర్వులు!
తెలంగాణ వ్యాప్తంగా అటవీ సంపదను కాపాడుతూ, తమ ప్రాణాలను సైతం లెక్కచేయకుండా కర్తవ్యాన్ని నిర్వహించే అటవీశాఖ సిబ్బందికి ప్రభుత్వం ఒక తీపికబురు అందించింది. విధి నిర్వహణలో అసాధారణ ధైర్యసాహసాలు, ప్రతిభ కనబరిచే అధికారులను, సిబ్బందిని ప్రత్యేకంగా గుర్తిస్తూ సత్కరించాలని నిర్ణయించింది. ఈ మేరకు వన మహోత్సవ వేడుకలను పురస్కరించుకుని రాష్ట్ర ప్రభుత్వం ఒక విప్లవాత్మకమైన నిర్ణయం తీసుకుంది. వన సంరక్షణ ప్రతిభా పురస్కార పతక నియమావళి అమల్లోకి తెచ్చింది.
అటవీశాఖలో ప్రతిభ కనబరిచేవారికి పురస్కారాలు
అడవుల రక్షణ, వన్యప్రాణుల సంరక్షణ, అక్రమ కలప రవాణాను నియంత్రించడంలో పనిచేసే క్షేత్ర స్థాయి సిబ్బందికి కొండంత అండగా నిలిచేందుకు ప్రభుత్వం సరికొత్త పురస్కార విధానాన్ని అమల్లోకి తెచ్చింది. "తెలంగాణ రాష్ట్ర వన సంరక్షణ ప్రతిభా పురస్కార పతక నియమావళి - 2026" పేరిట రూపొందించిన ఈ నూతన ఉత్తర్వుల వల్ల ప్రతి ఏటా రికార్డు స్థాయి సేవలు అందించిన సిబ్బందికి అధికారిక గుర్తింపు దక్కనుంది.
ఉద్యోగంలో మరింత అంకితభావం పెంపొందించేలా అవార్డులు
అటవీ రక్షణలో నిరంతరం శ్రమిస్తున్న సిబ్బందికి కేవలం ప్రశంసలు మాత్రమే కాకుండా, వారి సేవలకు తగిన ఆర్థిక గౌరవం లభించేలా ఈ ప్రతిష్టాత్మక అవార్డుల విధానాన్ని ప్రభుత్వం రూపొందించింది. దీని ద్వారా రాష్ట్రవ్యాప్తంగా పనిచేస్తున్న వందలాది మంది అటవీ సిబ్బందికి ఉద్యోగంలో మరింత అంకితభావం ఏర్పడుతుంది. ఈ సరికొత్త కార్యక్రమం తెలంగాణ అటవీ సంరక్షణ విభాగానికి కొత్త దిశను చూపుతుందని అధికారులు ఆశాభావం వ్యక్తం చేస్తున్నారు.
నాలుగు కేటగిరీలలో ప్రతిష్టాత్మక మెడల్స్
తెలంగాణ ప్రభుత్వం ప్రవేశపెట్టిన ఈ ప్రతిష్టాత్మక పురస్కారాలలో మొత్తం నాలుగు కేటగిరీలు ఉన్నాయి. వీటి ద్వారా క్షేత్ర స్థాయి సిబ్బంది నుండి ఉన్నతాధికారుల వరకు అందరికీ తగిన ప్రోత్సాహం అందేలా చర్యలు తీసుకున్నారు. ఈ అవార్డులను తెలంగాణ వన సంరక్ష పతకం, తెలంగాణ ఉత్తమ వన సంరక్ష పతకం, తెలంగాణ విశిష్ట వన సంరక్ష పతకం, అత్యున్నత రికార్డు నమోదు చేసిన వారికి ఇచ్చే ముఖ్యమంత్రి వన శౌర్య పతకంలుగా విభజించారు.
పురస్కారాలలో నగదు బహుమతులు
ఈ పురస్కారాలలో భాగంగా అవార్డు గ్రహీతలకు అందజేసే పతకాలతో పాటు ప్రత్యేక ఏకమొత్తం నగదు బహుమతిని కూడా ప్రభుత్వం అధికారికంగా ప్రకటించింది. దీని ప్రకారం తెలంగాణ వన సంరక్ష పతక గ్రహీతకు రూ.10,000 నగదు మరియు తెలంగాణ ఉత్తమ వన సంరక్ష పతకం పొందిన వారికి రూ.15,000 నగదు అందజేస్తారు. ఈ బహుమతులు వారి విధి నిర్వహణకు ఎంతో ప్రోత్సాహకరంగా నిలుస్తాయని ప్రభుత్వం తెలిపింది.
ప్రతి నెలా వేతనంతో పాటు అదనపు నగదు ప్రోత్సాహకం
మరింత మెరుగైన అత్యుత్తమ సేవలను నిరూపించుకున్న సిబ్బందికి అందించే తెలంగాణ విశిష్ట వన సంరక్ష పతకానికి అత్యధికంగా రూ.20,000 నగదు బహుమతి నిర్దేశించారు. వీటన్నింటికంటే అత్యంత ప్రతిష్టాత్మకమైనదిగా పరిగణించే తెలంగాణ ముఖ్యమంత్రి వన శౌర్య పతక గ్రహీతలకు రూ.25,000 నగదు ప్రోత్సాహకం అందజేస్తారు. నగదు బహుమతులతో పాటుగా వీరికి ప్రతి నెలా వేతనంతో పాటు అదనపు నగదు ప్రోత్సాహకం అందడం విశేషం.
Click it and Unblock the Notifications
Sign in with Google