తెలంగాణ పుర పోరు: నేడు నామినేషన్ల పరిశీలన.. అభ్యర్థుల్లో ఉత్కంఠ!
రాష్ట్రంలో పుర పోరు పతాక స్థాయికి చేరుకుంది. మున్సిపల్ ఎన్నికల షెడ్యూల్ విడుదలైనప్పటి నుంచి రాష్ట్రంలో పొలిటికల్ హీట్ ఒక్కసారిగా పెరిగిపోయింది. రాష్ట్ర ఎన్నికల సంఘం ప్రకటించిన గడువు ప్రకారం, నామినేషన్లు దాఖలు చేసే ప్రక్రియ శుక్రవారం సాయంత్రంతో ముగిసింది. చివరి రోజు కావడంతో ప్రధాన పార్టీలైన కాంగ్రెస్, బీఆర్ఎస్, బీజేపీ అభ్యర్థులతో పాటు స్వతంత్రులు కూడా భారీ సంఖ్యలో నామినేషన్లు దాఖలు చేశారు. పలుచోట్ల అభ్యర్థులు తమ బలాన్ని ప్రదర్శిస్తూ భారీ ర్యాలీలు, డప్పు వాయిద్యాల మధ్య తరలివచ్చి నామపత్రాలను సమర్పించారు.
నేడే నామినేషన్ల పరిశీలన (స్క్రూటినీ)
అభ్యర్థులు సమర్పించిన నామినేషన్లను ఎన్నికల అధికారులు ఈరోజు (శనివారం, జనవరి 31) క్షుణ్ణంగా పరిశీలించనున్నారు. ఈ నామినేషన్ల పరిశీలన ప్రక్రియలో అభ్యర్థుల అర్హతలను, వారు సమర్పించిన అఫిడవిట్లను, ఆస్తులు, అప్పులు, ఇతర డాక్యుమెంట్లను అధికారులు తనిఖీ చేస్తారు. ఏవైనా తప్పులున్నా లేదా నిబంధనలకు విరుద్ధంగా ఉన్నా ఆ నామినేషన్లను తిరస్కరించే అవకాశం ఉంటుంది. దీంతో తమ నామినేషన్ ఓకే అవుతుందా? లేదా? అని అభ్యర్థుల్లో ఉత్కంఠ నెలకొంది.
ఫిబ్రవరి 3న తుది జాబితా
నామినేషన్ల ఉపసంహరణకు ఫిబ్రవరి 3వ తేదీ వరకు సమయం ఇచ్చారు. బరిలో ఉండకూడదని భావించే వారు లేదా పార్టీ ఒత్తిడి మేరకు తప్పుకోవాలనుకునే వారు ఆ రోజు సాయంత్రం లోపు తమ నామినేషన్లను వెనక్కి తీసుకోవచ్చు. అనంతరం అదే రోజు సాయంత్రం ఎన్నికల బరిలో నిలిచే అభ్యర్థుల తుది జాబితాను అధికారులు విడుదల చేస్తారు. ఆ రోజే అసలైన పోటీ ఎవరి మధ్య ఉండబోతుందనే క్లారిటీ వస్తుంది.
ఎన్నికల కీలక తేదీలు ఇవే..
రాష్ట్రవ్యాప్తంగా మొత్తం 7 మున్సిపల్ కార్పొరేషన్లు, 116 మున్సిపాలిటీల్లో ఈ ఎన్నికలు జరుగుతున్నాయి. ఫిబ్రవరి 11న ఉదయం 7 గంటల నుంచి పోలింగ్ ప్రారంభమవుతుంది. ఫిబ్రవరి 13న ఓట్ల లెక్కింపు చేపట్టి, అదే రోజు సాయంత్రం లోపు ఫలితాలను ప్రకటిస్తారు. గెలిచిన వార్డు మెంబర్లు ఫిబ్రవరి 16న ప్రమాణ స్వీకారం చేస్తారు. అదే రోజు మేయర్, డిప్యూటీ మేయర్, ఛైర్మన్ల ఎన్నిక కూడా జరుగుతుంది.
హోరెత్తనున్న ప్రచార పర్వం
నామినేషన్ల ప్రక్రియ ముగియడంతో ఇక ప్రధాన పార్టీలన్నీ ప్రచారంపై ఫోకస్ పెట్టాయి. ఓటర్లను ఆకట్టుకునేందుకు ఇంటింటికీ తిరుగుతూ హామీల వర్షం కురిపిస్తున్నాయి. పట్టణ ప్రాంతాల్లో అభివృద్ధి, స్థానిక సమస్యలే అజెండాగా పార్టీలు రంగంలోకి దిగుతున్నాయి. అగ్రనేతలు కూడా ప్రచార బరిలోకి రానుండటంతో వచ్చే పది రోజులు తెలంగాణ మున్సిపల్ వీధులన్నీ రాజకీయ నినాదాలతో హోరెత్తనున్నాయి.
Click it and Unblock the Notifications
Sign in with Google