పోలీసు ఉద్యోగాల భర్తీపై కీలక ప్రకటన- ఏ విభాగంలో ఎన్ని... లెక్క ఇలా..!!

నిరుద్యోగులకు గుడ్ న్యూస్. ఖాళీల భర్తీ పై తెలంగాణ పోలీస్ రిక్రూట్‌మెంట్ బోర్డు త్వరలో భారీ స్థాయిలో పోలీస్ ఉద్యోగాల భర్తీకి నోటిఫికేషన్ విడుదల చేసేందుకు ఏర్పాట్లు పూర్తి చేసింది. మొత్తం 7,437 పోస్టులకు సంబంధించిన డ్రాఫ్ట్ నోటిఫికేషన్‌ సిద్దం చేసారు. త్వరలోనే ఈ పోస్టుల భర్తీకి నోటిఫికేషన్ జారీ కానుంది. ఏ విభాగంలో ఎన్ని పోస్టులు ఉన్నాయో వెల్లడించారు. పెద్ద మొత్తంలో పోలీసు శాఖలో ఈ ఖాళీలను భర్తీ చేయనున్నారు.

తెలంగాణ ప్రభుత్వం ఇప్పటికే పోలీసు శాఖలో పోస్టుల భర్తీకి సంబంధించి పూర్తి సమాచారం సేకరించింది. త్వరలోనే రిక్రూట్ మెంట్ బోర్డు నోటిఫికేషన్ జారీ చేయనుంది. మొత్తం 7,437 పోస్టులను భర్తీ చేయాలని డిసైడ్ అయ్యారు. అందులో 3,697 సివిల్ కానిస్టేబుల్ పోస్టులు, 1,052 ఆర్మ్‌డ్ రిజర్వ్ (AR) కానిస్టేబుల్ పోస్టులు, 1,380 స్పెషల్ ప్రొటెక్షన్ ఫోర్స్ (SPF) కానిస్టేబుల్ పోస్టులు భర్తీ చేయనున్నారు. అలాగే 148 సివిల్ సబ్‌ ఇన్‌స్పెక్టర్ (SI) పోస్టులకు కూడా నోటిఫికేషన్ విడుదల చేసేందుకు సన్నాహాలు జరుగుతున్నాయి. అంతేకాకుండా జైల్ వార్డెన్, ఫైర్ డిపార్ట్‌మెంట్ వార్డెన్ పోస్టుల భర్తీకి సంబంధించిన నోటిఫికేషన్లు కూడా ఇదే ప్రక్రియలో విడుదలయ్యే అవకాశం ఉందని తెలుస్తోంది.

నోటిఫికేషన్ జారీకి రంగం సిద్దం

దీని ద్వారా పోలీస్, జైల్, ఫైర్ సర్వీసుల్లో ఉద్యోగాలను లక్ష్యంగా పెట్టుకున్న అభ్యర్థులకు ఇది మంచి అవకాశంగా మారనుంది. ప్రస్తుతం డ్రాఫ్ట్ నోటిఫికేషన్ సిద్ధంగా ఉండగా, ప్రభుత్వ అనుమతులు పూర్తైన వెంటనే అధికారిక నోటిఫికేషన్ విడుదలయ్యే అవకాశం ఉందని అధికారులు వెల్లడించారు. నోటిఫికేషన్ విడుదలైన తర్వాత అర్హతలు, వయోపరిమితి, ఎంపిక విధానం, పరీక్ష తేదీలు, దరఖాస్తు ప్రక్రియ వంటి పూర్తి వివరాలను అధికారిక ప్రకటనలో వెల్లడించనున్నారు. పోలీస్ ఉద్యోగాల కోసం సిద్ధమవుతున్న అభ్యర్థులు ఇప్పటి నుంచే శారీరక దారుఢ్యం, రాత పరీక్ష, కరెంట్ అఫైర్స్ వంటి అంశాలపై ప్రణాళికాబద్ధంగా సిద్ధమైతే పోటీలో మెరుగైన అవకాశాలు సాధించవచ్చని అధికారులు పేర్కొంటున్నారు.

English summary

Telangana Police recruitment board to issue notification to fill above 7000 posts in various categories