బ్లూఫిలిం చూడాలని చిన్నారులకు ఉపాధ్యాయుడి ఫోర్స్

రాయపూర్: ఓ ప్రైమరీ పాఠశాల ఉపాధ్యాయుడు ఐదో తరగతి విద్యార్థినులను బ్లూ ఫిలిమ్స్ చూడాలని బలవంతం చేసిన సంఘటన చత్తీస్‍గఢ్‌లో చోటు చేసుకుంది. జంజీర్ జిల్లాలోని అకల్తారా పోలీసు స్టేషన్ పరిధిలో ఈ ఘటన శనివారం చోటు చేసుకుంది. ప్రభుత్వ ప్రాథమిక పాఠశాలలో పని చేస్తున్న ఓ ఉపాధ్యాయుడు ఆ ఘటన తర్వాత పారిపోయాడు. పోలీసులు ఆదివారం తెలిపిన వివరాలు ప్రకారం... నిందితుడుకి ఇరవయ్యారు ఏళ్లు. ఐదో తరగతి విద్యార్థినులను ఎవరూ లేని ఓ గదిలోకి తీసుకు వెళ్లి తన లాప్ టాప్‌లో బ్లూ ఫిలిమ్స్ చూడమని బలవంతం చేశాడు. బలవంతంగా తమతో ఆ చిత్రాలు చూపిస్తుండటంతో వారు అరిచారు.

వారు తనను అడ్డుకోవడంతో బెదిరిపోయిన ఉపాధ్యాయుడు తాను ఇలా చేసిన విషయాన్ని ఎవరికీ చెప్పవద్దని వారించి వారిని పంపించాడు. ఏ ఉపాధ్యాయుడికి గానీ తల్లిదండ్రులకు గానీ చెప్పవద్దని వారిని హెచ్చరించాడు. అయినప్పటికీ విద్యార్థినులు తమ తల్లిదండ్రులకు ఈ విషయాన్ని చెప్పారు. దీంతో ఆగ్రహం చెందిన తల్లిదండ్రులు శనివారం రాత్రి సదరు ఉపాధ్యాయుడిని పట్టుకొని చితకబాదారు. తల్లిదండ్రులు పోలీసులకు ఫిర్యాదు చేయడంతో పోలీసులు వచ్చేలోగా అతను పారిపోయాడు. పోలీసులు కేసు నమోదు చేసుకొని దర్యాఫ్తు చేస్తున్నారు.

English summary

A teacher in a government run primary school in a Chhattisgarh village war thrashed by locals for allegedly forcing the girl students to watch porn.