ఇవాళ్టి నుంచి భారీ వర్షాలు! ఉత్తరాదిలో వడగళ్ల వాన.. దక్షిణాదిలో హెవీ రెయిన్స్!
దేశంలో రుతుపవనాల గమనం వేగంగా మారుతోంది. ఒకవైపు నైరుతి రుతుపవనాలు దేశం నుంచి పూర్తిగా వెనక్కి తగ్గుతుండగా, మరోవైపు ఈశాన్య రుతుపవనాలు దక్షిణాది రాష్ట్రాలపై ప్రభావం చూపించేందుకు రంగం సిద్ధం చేసుకుంటున్నాయి. ఈ సీజన్ మారే తరుణంలో దేశంలోని పలు ప్రాంతాల్లో వాతావరణం ఒక్కసారిగా మారిపోనుంది. ఉత్తరాదిలో వడగళ్ల వానలు బీభత్సం సృష్టించనుండగా, దక్షిణాదిలో భారీ వర్షాలు పడే అవకాశం ఉందని వాతావరణ శాఖ హెచ్చరిస్తోంది.
ఢిల్లీ నుంచి పంజాబ్ వరకు.. వడగళ్ల వానల బీభత్సం!
ఉత్తర భారతదేశంలోని పలు ప్రాంతాల్లో వాతావరణం ఒక్కసారిగా చల్లబడనుంది. ముఖ్యంగా ఢిల్లీ, హర్యానా, పంజాబ్, చండీగఢ్ ప్రాంతాల్లో విస్తారంగా వర్షాలు కురిసే అవకాశం ఉంది. ఈ ప్రాంతాలతో పాటు జమ్మూ కశ్మీర్ లోనూ ఉరుములు, మెరుపులతో కూడిన వర్షాలు పడతాయని అంచనా వేశారు. గంటకు 40 నుంచి 50 కిలోమీటర్ల వేగంతో ఈదురుగాలులు వీచే అవకాశం ఉండటంతో ప్రజలు అప్రమత్తంగా ఉండాలని సూచించారు.
అంతేకాకుండా, ఢిల్లీ, హర్యానా, పంజాబ్, జమ్మూ కశ్మీర్ తో పాటు హిమాచల్ ప్రదేశ్, పశ్చిమ రాజస్థాన్ లోని కొన్ని ప్రాంతాల్లో అక్కడక్కడ వడగళ్ల వానలు పడే ముప్పు ఉంది. జమ్మూ కశ్మీర్, లడఖ్ పరిసర ప్రాంతాల్లో భారీ వర్షాలు కురిసే ఛాన్స్ ఉంది. ఈ అస్థిర వాతావరణం కేవలం ఒక్కరోజుతో ఆగకుండా, రాబోయే రోజుల్లోనూ కొనసాగుతుందని వాతావరణ శాఖ స్పష్టం చేసింది.
సౌత్ ఇండియాలో షురూ కానున్న భారీ వర్షాలు!
ఉత్తరాదిలో వానల సంగతి ఇలా ఉంటే, దక్షిణాది రాష్ట్రాలు మాత్రం భారీ వర్షాలకు సిద్ధమవుతున్నాయి. ప్రధానంగా తమిళనాడు, పుదుచ్చేరి, కారైకాల్ ప్రాంతాల్లో మోస్తరు నుంచి భారీ వర్షాలు కురిసే అవకాశం ఉంది. ఈ ప్రాంతాల్లో ఉరుములు, మెరుపులతో కూడిన వాతావరణం ఏర్పడనుంది.
రానున్న రోజుల్లో ఈ వర్షాల జోరు మరింత పెరగనుంది. కేవలం తమిళనాడు మాత్రమే కాకుండా కేరళ, మాహే, తీరప్రాంధ్రప్రదేశ్, కర్ణాటక తదితర దక్షిణ ద్వీపకల్ప ప్రాంతాల్లో కూడా విస్తారంగా వర్షాలు కురిసే అవకాశం ఉంది. ముఖ్యంగా ఏపీ, ఒడిశా రాష్ట్రాల్లో ఈదురుగాలులతో కూడిన ఉరుములు వస్తాయని హెచ్చరికలు జారీ అయ్యాయి. అయితే, తీర ప్రాంత కర్ణాటక, కొంకణ్, గోవా ప్రాంతాల్లో మాత్రం ఉక్కపోత, వేడి వాతావరణం యథావిధిగా కొనసాగుతుందని తెలిపారు.
నిష్క్రమిస్తున్న నైరుతి.. రానున్న ఈశాన్య రుతుపవనాలు!
గత కొన్ని నెలలుగా దేశాన్ని చుట్టుముట్టిన నైరుతి రుతుపవనాలు ఇప్పుడు పూర్తిగా నిష్క్రమించేందుకు అనుకూలమైన పరిస్థితులు ఏర్పడ్డాయి. సాధారణంగా జూన్ నుంచి సెప్టెంబర్ వరకు వర్షాలు కురిపించే నైరుతి గమనం ముగింపు దశకు చేరుకుంది.
దీనికి బదులుగా, దక్షిణాది రాష్ట్రాల్లో ఈశాన్య రుతుపవనాలు ప్రవేశించేందుకు రంగం సిద్ధమవుతోంది. ముఖ్యంగా తమిళనాడు, ఆగ్నేయ భారతదేశంలోని పలు ప్రాంతాలకు ఈ ఈశాన్య రుతుపవనాలే ప్రధాన ఆధారం. ఈ సీజన్ లోనే ఆయా ప్రాంతాలకు రావాల్సిన వార్షిక వర్షపాతంలో సింహభాగం అందుతుంది. మొత్తానికి, వర్షాల కేంద్రం ఉత్తరాది నుంచి క్రమంగా దక్షిణాది వైపు మారుతున్నట్లు తాజా వాతావరణ పరిస్థితులు స్పష్టం చేస్తున్నాయి.
Click it and Unblock the Notifications
Sign in with Google
