3 రోజుల్లోనే 10 వేల కండోమ్లు.. వింటర్ ఒలింపిక్స్లో వింత సమస్య!
Winter Olympics 2026:ఇటలీ వేదికగా జరుగుతున్న 'మిలాన్-కోర్టినా 2026' వింటర్ ఒలింపిక్స్లో ఓ వింత సమస్య నిర్వాహకులను ఉక్కిరిబిక్కిరి చేస్తోంది. క్రీడలు ప్రారంభమైన కేవలం 3 రోజుల్లోనే అథ్లెట్ల కోసం అందుబాటులో ఉంచిన కండోమ్ల స్టాక్ మొత్తం అయిపోయింది. క్రీడా గ్రామంలోని 92 దేశాలకు చెందిన సుమారు 2,900 మంది అథ్లెట్ల నుంచి వచ్చిన విపరీతమైన డిమాండ్తో ఈ పరిస్థితి తలెత్తింది. దీంతో క్రీడా ప్రాంగణంలో ఇప్పుడు 'కండోమ్ కొరత' హాట్ టాపిక్గా మారింది.
3 రోజుల్లోనే స్టాక్ ఖాళీ
ఒలింపిక్స్ ప్రారంభం సందర్భంగా నిర్వాహకులు సుమారు 10 వేల కండోమ్ ప్యాకెట్లను ఉచితంగా పంపిణీ చేసేందుకు సిద్ధం చేశారు. అథ్లెట్ల సంఖ్యను బట్టి ఈ నిల్వలు సరిపోతాయని వారు అంచనా వేశారు. అయితే క్రీడాకారులు ఊహించిన దానికంటే వేగంగా వీటిని వాడేయడంతో మూడో రోజే స్టాక్ ఖాళీ అయింది. కొత్త స్టాక్ ఎప్పుడొస్తుందో తెలియక అథ్లెట్లు ఇబ్బంది పడుతున్నారని.. నిర్వాహకుల వైఫల్యంపై విమర్శలు వస్తున్నాయని ఇటాలియన్ మీడియా సంస్థ 'లా స్టాంపా' కథనాన్ని ప్రచురించింది.
ఒలింపిక్ సంప్రదాయం.. సురక్షిత శృంగారం:
నిజానికి ఒలింపిక్స్లో అథ్లెట్లకు ఉచితంగా కండోమ్లను అందించడం అనేది 1988 సియోల్ ఒలింపిక్స్ నుంచి వస్తున్న ఒక సంప్రదాయం. క్రీడా గ్రామంలో అథ్లెట్ల మధ్య సురక్షిత శృంగారాన్ని ప్రోత్సహించడం, హెచ్ఐవీ/ఎయిడ్స్ వంటి ప్రాణాంతక వ్యాధుల వ్యాప్తిని నివారించడం దీని ప్రధాన ఉద్దేశం. సాధారణంగా సమ్మర్ ఒలింపిక్స్లో అథ్లెట్ల సంఖ్య ఎక్కువగా ఉంటుంది కాబట్టి లక్షల్లో స్టాక్ ఉంచుతారు. కానీ వింటర్ ఒలింపిక్స్లో క్రీడాకారులు తక్కువ కాబట్టి స్టాక్ తగ్గించడం ఇప్పుడు ఈ కొరతకు దారితీసింది.
పారిస్ ఒలింపిక్స్తో పోలిక
గతేడాది జరిగిన 2024 పారిస్ సమ్మర్ ఒలింపిక్స్లో దాదాపు 10,500 మంది అథ్లెట్లు పాల్గొన్నారు. వారి కోసం నిర్వాహకులు ఏకంగా 3 లక్షలకు పైగా కండోమ్లను అందుబాటులో ఉంచారు. కానీ మిలాన్ నిర్వాహకులు కేవలం 10 వేల ప్యాకెట్లతోనే సరిపెట్టడం పొరపాటని క్రీడా విశ్లేషకులు అభిప్రాయపడుతున్నారు. అథ్లెట్ల మధ్య పెరుగుతున్న సామాజిక సంబంధాలు, ఒత్తిడి తగ్గించుకునే మార్గాల్లో శృంగారం కూడా ఒకటని, అందుకే డిమాండ్ ఎక్కువగా ఉంటుందని వారు వివరిస్తున్నారు.
రంగంలోకి దిగిన నిర్వాహకులు:
తలెత్తిన ఈ వింత సమస్యను పరిష్కరించేందుకు మిలాన్ ఒలింపిక్ నిర్వాహకులు తక్షణమే చర్యలు చేపట్టారు. కొత్త స్టాక్ కోసం ఆర్డర్లు ఇచ్చామని, త్వరలోనే భారీ ఎత్తున కండోమ్ ప్యాకెట్లను క్రీడా గ్రామానికి తరలిస్తామని హామీ ఇచ్చారు. ఒలింపిక్స్ ముగిసే వరకు ఇలాంటి కొరత రాకుండా పకడ్బందీగా ఏర్పాట్లు చేస్తామని, అథ్లెట్ల ఆరోగ్య భద్రతే తమకు ముఖ్యమని వారు స్పష్టం చేశారు.
Click it and Unblock the Notifications
Sign in with Google