IPL 2026: మలుపు తిప్పిన ఆర్చర్, తుషార్.. ఉత్కంఠ పోరులో రాజస్థాన్ రాయల్స్ విజయం!

ఐపీఎల్ 2026 సీజన్‌లో రాజస్థాన్ రాయల్స్ జోరు కొనసాగుతోంది. వరుసగా రెండో మ్యాచ్‌లోనూ ఆ జట్టు విజయం సాధించింది. అహ్మదాబాద్ వేదికగా శనివారం ఉత్కంఠగా సాగిన మ్యాచ్‌లో రాజస్థాన్ రాయల్స్ 6 పరుగుల తేడాతో గుజరాత్ టైటాన్స్‌ను ఓడించింది. ఆఖరి బంతి వరకు ఉత్కంఠగా సాగిన ఈ మ్యాచ్‌లో జోఫ్రా ఆర్చర్, తుషార్ దేశ్ పాండే, రవి బిష్ణోయ్ అద్భుతమైన బౌలింగ్‌తో రాజస్థాన్ రాయల్స్ గెలుపొందింది.

211 పరుగుల భారీ లక్ష్య చేధనలో గుజరాత్ టైటాన్స్ 20 ఓవర్లలో 8 వికెట్లకు 204 పరుగులకే పరిమితమై ఓటమిపాలైంది. సాయి సుదర్శన్(44 బంతుల్లో 9 ఫోర్లు, 3 సిక్స్‌లతో 73) హాఫ్ సెంచరీతో రాణించినా ఫలితం లేకపోయింది. మిగతా బ్యాటర్లు దారుణంగా విఫలమయ్యారు. రాజస్థాన్ రాయల్స్ బౌలర్లలో రవి బిష్ణోయ్(4/41) నాలుగు వికెట్లు తీసి గుజరాత్ టైటాన్స్ పతనాన్ని శాసించాడు. నండ్రే బర్గర్, రియాన్ పరాగ్‌కు చెరో వికెట్ దక్కింది.

ఈ మ్యాచ్‌లో ముందుగా బ్యాటింగ్ చేసిన రాజస్థాన్ రాయల్స్ నిర్ణీత 20 ఓవర్లలో 6 వికెట్లకు 210 పరుగులు చేసింది. యశస్వి జైస్వాల్(36 బంతుల్లో 6 ఫోర్లు, 3 సిక్స్‌లతో 55), ధ్రువ్ జురెల్(42 బంతుల్లో 5 ఫోర్లు, 5 సిక్స్‌లతో 75) హాఫ్ సెంచరీలతో రాణించగా.. వైభవ్ సూర్యవంశీ(18 బంతుల్లో 5 ఫోర్లు, సిక్స్‌తో 31) దూకుడుగా ఆడాడు. గుజరాత్ బౌలర్లలో కగిసో రబడా(2/42) రెండు వికెట్లు తీయగా.. మహమ్మద్ సిరాజ్, అశోక్ శర్మ, ప్రసిధ్ కృష్ణ, రషీద్ ఖాన్ తలో వికెట్ తీసారు.

మలుపు తిప్పిన జోఫ్రా ఆర్చర్..

161 పరుగులకే 7 వికెట్లు కోల్పోయి ఓటమి దిశగా సాగిన గుజరాత్ టైటాన్స్‌కు రషీద్ ఖాన్(24), కగిసో రబడా(23 నాటౌట్) దూకుడైన బ్యాటింగ్‌తో ఆశలు రేపారు. ఈ ఇద్దరూ 8వ వికెట్‌కు 43 పరుగులు జోడించారు. ఓ దశలో గుజరాత్ టైటాన్స్ విజయం లాంఛనం అనిపించింది. కానీ 19వ ఓవర్‌లో జోఫ్రా ఆర్చర్ కట్టడిగా బౌలింగ్ చేసి 4 పరుగులు మాత్రమే ఇచ్చాడు. ఈ ఓవర్‌ మ్యాచ్‌ను రాజస్థాన్ రాయల్స్‌వైపు టర్న్ చేసింది.

ఆఖరి ఓవర్‌లో గుజరాత్ టైటాన్స్ విజయానికి 11 పరుగులు అవసరమయ్యాయి. వైడ్‌తో ఈ ఓవర్ ప్రారంభించిన తుషార్ దేశ్‌పాండే తర్వాతి 6 బంతులకు మూడు పరుగులే ఇచ్చి రషీద్ ఖాన్‌ను ఔట్ చేశాడు. దాంతో రాజస్థాన్ రాయల్స్ విజయం లాంఛనమైంది. కచ్చితమైన యార్కర్లతో రషీద్ ఖాన్, రబాడను బోల్తా కొట్టించాడు.

English summary

Jofra Archer and Tushar Deshpande’s clinical death bowling turned the tide for RR, stifling GT's chase in the final overs to secure a thrilling victory in IPL 2026.