Jemimah Rodrigues: ఓడిన చోటే గెలిచిన జెమీమా..! ముంబై క్లబ్ సభ్యత్వం రద్దు వివాదమేంటి ?

జెమీమా రోడ్రిగ్స్.. నిన్న నవీ ముంబైలో జరిగిన మహిళల క్రికెట్ ప్రపంచకప్ సెమీస్ లో ఆస్ట్రేలియాపై సెంచరీతో అజేయంగా నిలిచి భారత్ ను ఫైనల్లోకి తీసుకెళ్లిన ఈ యువ కెరటం పేరు ఇప్పుడు ప్రపంచవ్యాప్తంగా మార్మోగుతోంది. భారత్ లో క్రికెట్ కేంద్రంగా ఉన్న ముంబై నుంచి క్రికెటర్ గా ఎదిగిన జెమీమా నిన్న సొంతగడ్డపై సాధించిన సెంచరీ ఆమెను మేటి క్రికెట్ క్రీడాకారిణుల జాబితాలో నిలబెట్టింది. అయితే అదే సమయంలో గతేడాది అదే ముంబైలో ఆమె ఎదుర్కొన్న ఓ అవమానాన్ని కూడా తెరపైకి తెచ్చింది.

నిన్న ఆస్ట్రేలియాతో జరిగిన ఐసీసీ మహిళల ప్రపంచ కప్ సెమీ-ఫైనల్‌లో జెమీమా అజేయంగా 127 పరుగులు చేసి భారత్‌ను చారిత్రాత్మక ఛేజ్ లో నిలబెట్టడమే కాకుండా టోర్నీలో ఫైనల్ బెర్తును ఖరారు చేయించింది. గతేడాది ఇదే సమయంలో ఆమె అదే ముంబైలో ఎదుర్కొన్న ఓ అవమానం తర్వాత నెలల తరబడి చేసిన పోరాటం, విమర్శలు, క్లబ్ వివాదం తర్వాత సాధించిన ఈ విజయం జెమీమాను తీవ్ర భావోద్వేగానికి గురి చేసింది. అందుకే నిన్న మ్యాచ్ లో భారత్ గెలవగానే జెమీమా ఉద్వేగాన్ని అస్సలు ఆపుకోలేకపోయింది.

గతేడాది అక్టోబర్ నెలలో అంటే కచ్చితంగా ఏడాది క్రితం జెమిమా రోడ్రిగ్స్ గౌరవ సభ్యత్వాన్ని ముంబైలోని ఖర్ జింఖానా క్లబ్ రద్దు చేసింది. జెమీమా తండ్రి రోడ్రిగ్స్ ఆమెకు క్లబ్ ను ప్రైవేట్ కార్యక్రమాలకు నిర్ణీత రుసుము చెల్లించి వాడుకునేందుకు ఇచ్చిన అవకాశాన్ని దుర్వినియోగం చేస్తున్నారని, అక్కడ మతపరమైన కార్యక్రమాలు నిర్వహిస్తున్నారనేది ఇక్కడ ఆరోపణ. అయితే ఈ ఆరోపణల్ని జెమీమా, తండ్రి రోడ్రిగ్స్ ఖండించినా ఫలితం లేదు.

జెమీమా రోడ్రిగ్స్ ఇలా ముంబై ఖర్ జింఖానా క్లబ్ సభ్యత్వం రద్దుతో పాటు తీవ్ర విమర్శలు కూడా ఎదుర్కొంది. ఇందులో ఆమె మతం పేరుతో ఎక్కువ విమర్శలు ఎదుర్కొంది. దీన్నుంచి బయటపడేందుకు జెమీమా చాలా కష్టపడింది. జట్టులో స్ధానం కూడా కోల్పోయింది. చివరికి తన మేటి ప్రదర్శనతో తిరిగి జట్టులోకి రాగలిగింది. వచ్చిన అవకాశాన్ని అందిపుచ్చుకుంది. కీలకమైన ఆస్ట్రేలియాతో సెమీస్ మ్యాచ్ లో సెంచరీతో అదరగొట్టింది. చివరికి సెంచరీ కొట్టినా లైట్ తీసుకుంది. మ్యాచ్ గెలిపించి తానేంటో నిరూపించుకుంది. దీని వెనుక ఏడాదిగా ఆమె పడిన బాధ, పట్టుదల, ఉద్వేగం ఇలా చాలానే ఉన్నాయి.