టిడిపి: తెలంగాణకు నారా లోకేష్, ఆంధ్రకు బాలయ్య?
తాను పుట్టింది తెలంగాణలో, తమ కుటుంబానిది రాయలసీమ, తాను ఆంధ్రా అల్లుడిని అంటూ లోకేష్ యువత సమావేశంలో మూడు ప్రాంతాలనూ ప్రస్తావించారు. గతంలో ఎప్పుడూ లోకేష్ తెలంగాణలో పుట్టినట్టు చెప్పుకోలేదు. గతంలో తెలంగాణ ఉద్యమంలో భాగంగా సకల జనుల సమ్మె సాగుతున్నప్పుడు జూనియర్ ఎన్టీఆర్ సినిమా విడుదలను తెలంగాణవాదులు అడ్డుకుంటామని ప్రకటించినప్పుడు జూనియర్ ఎన్టీఆర్ తాను హైదరాబాద్లో పుట్టానని చెప్పుకున్నారు. కానీ తెలంగాణ అని చెప్పుకోలేదు. కానీ లోకేష్ తాను తెలంగాణలో జన్మించానని చెప్పుకోవడం ద్వారా తెలంగాణ సెంటిమెంటును తనకు అనుకూలంగా మార్చుకునే ప్రయత్నాలు చేస్తున్నారు.
తొలిసారిగా లోకేష్ శనివారం పార్టీ నేతల సమావేశాల్లో పాల్గొన్నారు. యువత, విద్యార్థులతో ప్రత్యేకంగా సమావేశమయ్యారు. ఈ సమావేశంలో సీమాంధ్ర యువత, విద్యార్థి నేతలు పార్టీ సమైక్యాంధ్ర నినాదం ఇవ్వాలని సూచించగా, లోకేశ్ నిరాకరించారు. తెలంగాణలో పార్టీ బలంగా ఉందని, వైయస్సార్ కాంగ్రెసు తరహాలో తెలంగాణ ప్రజలను మోసం చేయలేమని చెప్పుకొచ్చారు.
లోకేశ్ రాష్టవ్య్రాప్తంగా పర్యటించనున్నట్టు ప్రకటించారు. తండ్రి కొడుకులు దాదాపు ఒకే సమయంలో రాష్ట్రంలో పర్యటించనున్నారు. మరోవంద రోజుల్లో ఎన్నికలు జరుగనున్నందున రాష్ట్రంలో విస్తృతంగా పర్యటించనున్నట్టు చంద్రబాబు ప్రకటించారు. అదేవిధంగా వంద రోజులపాటు పర్యటిస్తానని లోకేష్ యువత, విద్యార్థి నేతలతో జరిగిన సమావేశంలో తెలిపారు. బాబు సీమాంధ్రలో పర్యటించే సమయంలోనే లోకేష్ తెలంగాణలో పర్యిటించే విధంగా కార్యక్రమాలకు రూపకల్పన చేస్తున్నారు.
Click it and Unblock the Notifications
Sign in with Google