APPSC Group1 Prelims Results: ఏపీపీఎస్సీ గ్రూప్ 1 ప్రిలిమ్స్ ఫలితాల విడుదల-లిస్ట్ ఇదే..!

ఆంధ్రప్రదేశ్ పబ్లిక్ సర్వీస్ కమిషన్ ఈ ఏడాది నిర్వహించిన గ్రూప్ 1 ప్రిలిమ్స్ పరీక్ష ఫలితాలు ఇవాళ విడుదలయ్యాయి. ఇప్పటికే అభ్యర్ధులు ప్రిలిమ్స్ ఫలితాల కోసం ఉత్కంఠగా ఎదురుచూస్తున్నారు. తాజాగా గ్రూప్ 2 ప్రిలిమ్స్ ఫలితాలు ప్రకటించిన కమిషన్.. ఇవాళ గ్రూప్ 1 ప్రిలిమ్స్ ఫలితాలు కూడా విడుదల చేసింది. ఈ మేరకు కమిషన్ అధికారిక వెబ్ సైట్ లో ఎంపికైన అభ్యర్ధుల జాబితాలు ఉంచారు.

రాష్ట్రంలో వివిధ కేటగిరీల్లో ఖాళీగా ఉన్న 81 పోస్టుల భర్తీ కోసం గత ఏడాది డిసెంబర్లో ఏపీపీఎస్సీ గ్రూప్ 1 నోటిఫికేషన్ విడుదల చేసింది. దీని ప్రకారం ఈ ఏడాది మార్చి 17న గ్రూప్ 1 ప్రిలిమ్స్ పరీక్ష నిర్వహించింది. ఈ పరీక్షకు దాదాపు లక్షన్నర మంది దరఖాస్తు చేసుకున్నారు. వీరిలో లక్షకు పైగా పరీక్ష రాశారు. గ్రూప్ 1 ప్రిలిమ్స్ పేపర్ 1, పేపర్ 2 పరీక్షలు రాసిన వారిలో 567 మంది అభ్యర్ధుల్ని తిరస్కరించారు. అలాగే 4496 మందిని మెయిన్స్ పరీక్ష కోసం ఎంపిక చేశారు. ఈ మేరకు రెండు వేర్వేరు జాబితాల్ని ఏపీపీఎస్సీ విడుదల చేసింది.

ఈ ఏడాది సెప్టెంబర్ 2 నుంచి సెప్టెంబర్ 7వ తేదీ వరకూ గ్రూప్ 1 మెయిన్స్ పరీక్షల్ని ఏపీపీఎస్సీ నిర్వహించాల్సి ఉంది. అంటే దాదాపు ఐదు నెలల వ్యవధి లభించింది. దీంతో అభ్యర్ధులు సీరియస్ గా ప్రిపేర్ అయ్యేందుకు అవకాశం ఉంది. ఇవాళ విడుదల చేసిన ఫలితాల జాబితాలను మీ సౌలభ్యం కోసం వన్ ఇండియా తెలుగు వెబ్ సైట్ లో అందుబాటులో ఉంచాం. కాబట్టి అభ్యర్ధులు ఇందులో తమ హాల్ టికెట్ నంబర్ ఆధారంగా ఫలితాలు తెలుసుకోవచ్చు.

English summary

andhra pradesh public service commission has released group 1 prelims exam results today.