జగన్ తెలంగాణ అనుకూల వైఖరి?

ప్రాంతీయ పార్టీ పెట్టడానికి రంగం సిద్ధం చేసుకుంటున్న వైయస్ జగన్ తెలంగాణ విషయంలో పునరాలోచనలో పడినట్లు ప్రచారం సాగుతోంది. తెలంగాణలో కాంగ్రెసును, తెలంగాణ రాష్ట్ర సమితి (తెరాస)లను దెబ్బ తీయడమే ప్రధాన లక్ష్యంగా ఆయన తెలంగాణ వైఖరిని ప్రకటించే అవకాశాలున్నట్లు చెబుతున్నారు. వైయస్ జగన్ వర్గానికి చెందిన శాసనసభ్యురాలు కొండా సురేఖ మాటలను బట్టి ఆ విషయం అర్థమవుతోంది. జగన్ తో తెలంగాణకు జైకొట్టిస్తామని ఆమె చెప్పారు. దీన్ని బట్టి వైయస్ జగన్ తెలంగాణకు అనుకూలంగా నిర్ణయం తీసుకునే అవకాశాలున్నాయి. తెలంగాణ వ్యతిరేక వైఖరి వల్ల వైయస్ జగన్ ఇప్పటి వరకు తెలంగాణలో అడుగు పెట్టబోతున్నారు. తెలంగాణలో తనకు మద్దతిస్తున్న నాయకులు, వైయస్సార్ అభిమానులు దండిగా ఉన్నప్పటికీ తనపై సమైక్యవాద ముద్ర పడడం తీవ్ర ఆటంకంగా మారిందని ఆయన అనుకుంటున్నట్లు తెలుస్తోంది. తెలంగాణకు అనుకూలంగా నిర్ణయం తీసుకుంటే కాంగ్రెసు, తెరాసలను ఎండగట్టడం తనకు సులభమవుతుందని ఆయన భావిస్తున్నట్లు చెబుతున్నారు.

కాంగ్రెసుకు దగ్గరైన ప్రజారాజ్యం పార్టీ అధ్యక్షుడు చిరంజీవి సమైక్యాంధ్ర నినాదం తీసుకోవడంతో తెలంగాణ అనుకూల వైఖరి తనకు ఎనలేని ప్రయోజనం చేకూరుస్తుందని ఆయన అనుకుంటున్నట్లు చెబుతున్నారు. కాంగ్రెసు, తెరాసలు కుమ్మక్కయి తెలంగాణ అంశాన్ని రాజకీయాలకు మాత్రమే వాడుకుంటూ తెలంగాణ సాధన అంశాన్ని పక్కన పెడుతున్నాయనే వాదనను ఆయన బలంగా వినిపించే అవకాశాలున్నాయి. తెరాస అధ్యక్షుడు కె. చంద్రశేఖర రావు, కాంగ్రెసు సీనియర్ నాయకుడు కె. కేశవరావుల మధ్య జరిగిన రహస్య సమాలోచనలేమిటో వెల్లడించాలని ఇటీవల కొండా సురేఖ అడిగారు. దీన్ని బట్టి వైయస్ జగన్ వైఖరి తెలంగాణపై ఎలా ఉంటుందో, తెరాస, కాంగ్రెసులను ఏ విధంగా ఇరకాటంలో పెట్టవచ్చో వైయస్ జగన్ ఒక అంచనాకు వచ్చినట్లు చెబుతున్నారు.

తెలంగాణ ఇవ్వాల్సింది కాంగ్రెసు పార్టీ అని, ఇందులో తాను చేయాల్సిందేమీ లేదని, తెలంగాణ ఇస్తే తాను అడ్డుకోబోనని వైయస్ జగన్ తెలంగాణ ప్రజలకు వివరించే అవకాశాలున్నాయి. అవసరమైతే తెలంగాణ రాష్ట్ర సాధనకు తన సహకారం ఉంటుందని కూడా ఆయన చెప్పే అవకాశాలున్నాయి. 2014లో అధికారమే పరమావధిగా వైయస్ జగన్ ప్రాంతీయ పార్టీ పెడుతున్నారు. దాని కోసం ఆయన తెలంగాణ వైఖరిని మార్చుకోవచ్చునని అంటున్నారు. మొత్తం మీద, కొద్ది రోజుల్లో రాష్ట్ర రాజకీయాల్లో మరిన్ని మార్పులు చోటు చేసుకునే అవకాశాలున్నాయి.