పాలకొల్లు సైతం అల్లు ఖాతాకు?

చిరంజీవి పాలకొల్లు, తిరుపతి స్ధానాల నుంచి పోటీ చేస్తున్నారు. ఆయన రెండు స్ధానాల్లో గెలుపొందితే ఏదో ఒక స్ధానానికి రాజీనామా చేయవలసి ఉంటుంది. చిరంజీవి తిరుపతి స్ధానాన్ని ఉంచుకుని పాలకొల్లు స్ధానానికి రాజీనామా చేస్తారని తెలుస్తోంది. ఖాళీ అయ్యే పాలకొల్లు స్ధానాన్ని అల్లు అరవింద్ సోదరి వసంత కోసం రిజర్వు చేసినట్టు తెలుస్తోంది. ప్రస్తుతం గీతా ఆర్ట్స్ కంపెనీ వ్యవహారాలు చూస్తున్న వసంత మహిళారాజ్యం వ్యవహారాలను కూడా పర్యవేక్షిస్తున్నారు. ఆమె అధికారికంగా బయటకు కన్పించకపోయినా పార్టీ అంతర్గత వ్యవహారాల్లో కీలక పాత్ర వహిస్తున్నట్టు తెలిసింది.

పాలకొల్లు సీటుని ఆశించిన ఒక నాయకుడు ముఖ్య నేతను కలిసినప్పుడు ఈ విషయం బయటపడింది. చిరంజీవి పాలకొల్లు స్ధానాన్ని వదులుకుంటారని తెలిసిన కార్యకర్తలు నీరసించిపోవడమే కాకుండా ఆగ్రహం కూడా వ్యక్తం చేస్తున్నారు. అధినాయకుడిని తాము కష్టపడి గెలిపించుకున్న ఫలితమేముంటుందని వారు ప్రశ్నిస్తున్నారు. అల్లు అరవింద్ స్కెచ్ పాలకొల్లుకు కూడా పాకడం చర్చనీయాంశమైంది.