వైయస్ జగన్‌కు 'గాలి' వాత?

By Pratap

Published: Wednesday, March 16, 2011, 9:34 [IST]

ప్రస్తుత వైయస్సార్ కాంగ్రెసు పార్టీ నేత వైయస్ జగన్‌కు కర్ణాటక మంత్రి గాలి జనార్దన్ రెడ్డి దూరం కావాలని నిర్ణయించుకున్నట్లు అర్థమవుతోంది. దివంగత నేత వైయస్ రాజశేఖర రెడ్డి కుటుంబానికి గాలి జనార్దన్ రెడ్డి అత్యంత సన్నిహితుడు. దీంతో ఆయన జగన్‌తో కలిసి పలు వ్యాపారాలు చేసినట్లు సమాచారం. ఈ చెలిమితో గాలి జనార్దన్ రెడ్డి ఓబుళాపురం మైనింగ్ లీజు పొందారు. ఇందులో భాగంగానే ఆయన రాయలసీమలో బ్రాహ్మణి స్టీల్స్ అనే ఉక్కు కర్మాగారాన్ని కూడా స్థాపించదలుచుకున్నారు. ఆ కర్మాగారానికి ముడి ఇనుమును వాడుకోవడానికి ఓబుళాపురం గనులను కట్టబెట్టారు. బ్రాహ్మణి స్టీల్స్ పూర్తయ్యే వరకు ముడి ఇనుమును అమ్ముకోవడానికి అవకాశం కల్పించారు. దాంతో గాలి జనార్దన్ రెడ్డి బ్రాహ్మణి స్టీల్స్‌ను పక్కన పెట్టేసి పెద్ద యెత్తున ముడి ఇనుమును ఎగుమతి చేసి కోట్లాది రూపాయలు సంపాదించారని అంటారు.

ఆ వ్యాపార సంబంధాలతో గాలి జనార్దన్ రెడ్డి వైయస్ మరణం తర్వాత కూడా వైయస్ జగన్‌కు అండదండలు అందిస్తూ వచ్చారని అంటారు. కాంగ్రెసు అధిష్టానంపై తిరుగుబాటు కోసం ఆయన జగన్‌కు చేయూత అందించారు. దానికితోడు, జగన్‌ను తమ బిజెపికి దగ్గర చేయడానికి కూడా ఆయన ప్రయత్నించినట్లు చెబుతారు. ఆంధ్రప్రదేశ్‌లో బిజెపిని బలోపేతం చేయడానికి జగన్ అండదండలు ఆశించారు. అయితే, జగన్ బిజెపితో ఏ విధమైన సంబంధాలుండవని ప్రకటించడమే కాకుండా దాన్ని ఆచరణలో కూడా చూపారు. దీంతో జగన్‌కు గాలి జనార్దన్ రెడ్డి తోడ్పాటు అందించడం మానేశారని అంటున్నారు. అంతేకాదు, ఇప్పుడు బ్రాహ్మణి స్టీల్స్‌ను కూడా వదులుకుంటున్నట్లు ప్రకటించారు.

Published On March 16, 2011