వైయస్ జగన్‌తో కలిసి 'గాలి'

By Pratap

Published: Saturday, May 28, 2011, 10:05 [IST]

బిజెపి నాయకుడు, కర్ణాటక మంత్రి గాలి జనార్దన్ రెడ్డి వైయస్సార్ కాంగ్రెసు పార్టీ అధ్యక్షుడు వైయస్ జగన్మోహన్ రెడ్డితో కలిసి పనిచేస్తున్నారని ఇప్పుడు కచ్చితంగా చెప్పవచ్చు. గాలి జనార్దన్ రెడ్డి మాటలే ఆ విషయాన్ని తెలియజేస్తున్నాయి. వైయస్ జగన్‌తో కలిసి పనిచేయాలని ఆయన ఆంధ్రప్రదేశ్‌లోని బిజెపి కార్యకర్తలకు సూచించారు. ఆయన శుక్రవారం అనంతపురం జిల్లా కసాపురం నెట్టికంటి ఆంజనేయ స్వామిని దర్శించుకున్నారు. గుంతకల్లులో ఆయనకు బిజెపి నాయకులు వీడ్కోలు పలికారు. ఈ సందర్భంగా ఆయన వారికి ఆ హితబోధ చేశారు.

భవిష్యత్తులో ఆంధ్రప్రదేశ్ జగన్‌దేనని కూడా గాలి జనార్దన్ రెడ్డి జోస్యం చెప్పారు. రాష్ట్రంలో కాంగ్రెసు నామరూపాలు లేకుండా పోతుందని ఆయన శాపం పెట్టారు. ఆంధ్రప్రదేశ్‌లో బిజెపిని పటిష్టపరుస్తానని కూడా ఆయన హామీ ఇచ్చారు. అంటే, రాష్ట్ర అధ్యక్షుడు కిషన్ రెడ్డిని పక్కన పెట్టేసి ఆంధ్రప్రదేశ్ బిజెపి వ్యవహారారాల్లో గాలి జనార్దన్ రెడ్డి పక్కన పెడుతున్నారని అనుకోవాల్సి వస్తుందేమో.

Published On May 28, 2011