బాలకృష్ణకు దగ్గరవుతున్న హీరో రాజశేఖర్?

By Pratap

Published: Saturday, February 4, 2012, 11:00 [IST]

శత్రువు శత్రువు మిత్రుడు అనే సూత్రాన్ని హీరో రాజశేఖర్ అనుసరిస్తున్నట్లే కనిపిస్తున్నారు. చిరంజీవి తన ప్రజారాజ్యం పార్టీని కాంగ్రెసులో విలీనం చేసిన తర్వాత రాజశేఖర్ ఏ రాజకీయ పార్టీలోనూ లేకుండా పోయారు. చిరంజీవి రావడం వల్లనే తాము కాంగ్రెసు నుంచి బయటకు వచ్చామని ఆయన చెప్పుకున్నారు. వైయస్సార్ కాంగ్రెసు పార్టీ అధ్యక్షుడు వైయస్ జగన్ వద్ద ఆయనకు తగిన ఆదరణ లభించలేదని తెలుస్తోంది. అయితే, అప్పుడే ఆయన తెలుగుదేశం పార్టీలో చేరడానికి ప్రయత్నించారు. కానీ ఆ పార్టీ అధ్యక్షుడు నారా చంద్రబాబు నాయుడు వద్ద రాజశేఖర్, జీవిత దంపతులు గొంతెమ్మ కోర్కెలు ఏవో పెట్టారట. వాటికి చంద్రబాబు ససేమిరా అనడంతో ఆ పార్టీకి కూడా దూరంగా ఉండిపోయారు.

ఇప్పుడు బాలకృష్ణ తెలుగుదేశం పార్టీ సింహంలా గర్జిస్తున్నారు. దీంతో తెలుగుదేశం పార్టీలో బాలకృష్ణ హవా నడిచే పరిస్థితులున్నాయి. ఈ విషయం గ్రహించిన రాజశేఖర్ బాలకృష్ణకు దగ్గరవుతున్నట్లు చెబుతున్నారు. చిరంజీవిని రాజకీయంగా ఎదుర్కోవడానికి బాలకృష్ణ సిద్ధపడడం ఆయన మనసుకు బాగా నచ్చిందట. దీంతో ఆయన బాలకృష్ణతో స్నేహం చేయాలని నిర్ణయించుకున్నట్లు చెబుతున్నారు. శనివారం హైదరాబాదులో జరిగిన క్యాన్సర్ అవేర్‌నెస్ వాక్‌లో రాజశేఖర్ బాలకృష్ణ అడుగులో అడుగులు వేశారు. మిగతా నటులు చాలా మంది ఇందులో పాల్గొన్నప్పటికీ రాజశేఖర్ పాల్గొనడం ప్రత్యేకమైందేనని అంటున్నారు.

Published On February 4, 2012