కిరణ్ ప్లాన్: చిరు ముద్దు, బొత్స వద్దు

By Pratap

Published: Friday, March 2, 2012, 11:26 [IST]

ముఖ్యమంత్రి కిరణ్ కుమార్ రెడ్డి ప్లాన్ పారినట్లే ఉంది. చిరంజీవిని చేరదీసి, పిసిసి అధ్యక్షుడు బొత్స సత్యనారాయణకు చెక్ పెట్టాలనే ముఖ్యమంత్రి ప్లాన్ ఫలితాలు ఇస్తున్నట్లే కనిపిస్తోంది. బొత్స సత్యనారాయణకు సహకరించడానికి ముఖ్యమంత్రి వర్గం నిరాకరిస్తుండడమే కాకుండా ఆయనకు వ్యతిరేకంగా కూడా పనిచేస్తోంది. బొత్స సత్యనారాయణ జోడు పదవులపై ఇప్పటికే ఓ వర్గం పార్టీ అధిష్టానానికి ఫిర్యాదు చేసింది. తెలంగాణ నేతకు పిసిసి అధ్యక్ష పదవి ఇవ్వాలనే డిమాండును కూడా కిరణ్ వర్గీయులు ముందుకు తెచ్చారు.

అదంతా పక్కన పెడితే, తాజాగా శాసనసభలో బొత్స సత్యనారాయణ తీవ్రమైన ఇబ్బందులకు గురయ్యారు. మద్యం సిండికేట్లపై మాట్లాడడానికి ప్రయత్నించినప్పుడు స్పీకర్ నాదెండ్ల మనోహర్ మైక్ కట్ చేశారు. ఒక మంత్రి మైక్‌ను స్పీకర్ కట్ చేయడం చర్చనీయాంశంగానే మారింది. అదే సమయంలో మద్యం సిండికేట్లపై ప్రతిపక్ష నాయకుడు, తెలుగుదేశం సభ్యులు బొత్స సత్యనారాయణపై విరుచుకుపడుతుంటే అధికార కాంగ్రెసు సభ్యులు నిమ్మకు నీరెత్తినట్లు వ్యవహరించారు. బొత్సకు మద్దతుగా ఎవరూ ముందుకు రాలేదు. ఈ రకంగా బొత్స సత్యనారాయణను ఒంటరి చేయాలనే కిరణ్ కుమార్ రెడ్డి ప్లాన్ అమలవుతున్నట్లు చెబుతున్నారు.

Published On March 2, 2012