జైల్లో ఉన్న జగన్‌కు లెటర్స్ మీద లెటర్స్

అక్రమాస్తుల కేసులో అరెస్టై చంచల్‌గూడ జైలులో ఉంటున్న వైయస్సార్ కాంగ్రెసు పార్టీ అధ్యక్షుడు, కడప పార్లమెంటు సభ్యుడు వైయస్ జగన్మోహన్ రెడ్డి నెలకు యాభై నుండి అరవై వరకు ఉత్తరాలను అందుకుంటున్నారట. జైలులో ఉన్న వారిని కలిసేందుకు ములాకత్‌లు ఉన్నాయి. వారానికి ఇన్ని ములాకత్‌లు అని లిమిట్స్ ఉన్నాయి. కుటుంబ సభ్యులు, బంధువులు, స్నేహితులు.. ఇతరులతో ఉత్తర ప్రత్యుత్తరాలు జరుపుకునేందుకు కూడా నిబంధనలు ఉన్నాయి.

మే 27న అరెస్టైన జగన్‌కు కూడా తోటీ ఖైదీల్లాగే ఉత్తరాలు వస్తున్నాయి. ఆయనకు ఒక నెలకు దాదాపు అరవై వరకు ఉత్తరాలు వస్తున్నాయట. జగన్‌కు ఉత్తరాలు వస్తున్నాయని జైలు సూపరింటెండెంట్ తెలియజేశారు. జగన్ పార్లమెంటు సభ్యుడు కావడంతో పార్లమెంటు, ప్రభుత్వ కార్యాలయాలు, ఇతరుల నుండి ఉత్తరాలు వస్తున్నట్లు ఆయన చెప్పారు. కాగా జగన్ జైలు నుండి రాజకీయాలు నెరపుతున్నారని టిడిపి ఆరోపిస్తున్న విషయం తెలిసిందే.

జైలులో ఉన్న జగన్‌కు నిబంధలకు మించి ములాకత్‌లను అనుమతిస్తున్నారని, సెల్ ఫోన్ ఉపయోగిస్తున్నారని, ఫెసిలిటీస్ విషయంలోనూ ఇతర విఐపిల ఖైదీల కంటే భిన్నంగా ఉంటుందని.. జగన్‌కు సంబంధించిన వీడియోలను మీడియాకు విడుదల చేయాలని టిడిపి డిమాండ్ చేస్తోంది.

English summary

YSR Congress party chief and Kadapa MP YS Jaganmohan Reddy is receiving 50 to 60 letters for month, who is Chanchalguda jail in DA case.