సిఎం క్లాస్: తెలంగాణ కాంగ్రెసు ఎమ్మెల్యేల అసెంబ్లీ బహిష్కరణ

By Srinivas

Published: Monday, February 28, 2011, 11:25 [IST]

హైదరాబాద్: తెలంగాణ ప్రాంతానికి చెందిన కాంగ్రెసు పార్టీ శాసనసభ్యులు, శాసనమండలి సభ్యులు సోమవారం బడ్జెట్ సమావేశాలను బహిష్కరిస్తున్నట్లు చెప్పారు. పార్లమెంటులో తెలంగాణ బిల్లును పెట్టే వరకు తెలంగాణ కోసం మేం పోరాడుతామని వారు అసెంబ్లీని బహిష్కరించిన అనంతరం మీడియా పాయింట్ వద్ద మాట్లాడుతూ చెప్పారు. తెలంగాణ సాధించే వరకు పోరాటం ఆగదన్నారు. కేంద్రం వెంటనే తెలంగాణ బిల్లు పార్లమెంటులో పెట్టి ప్రత్యేక తెలంగాణ రాష్ట్రానికి అనుకూలంగా నిర్ణయం తీసుకోవాలని కోరారు. తెలంగాణ కోసం మేం ఒంటరిగా పోరాడుతామన్నారు. అయితే తాము ఎవరికీ వ్యతిరేకం కాదన్నారు. అందరితో కూడా కలిసి వెళతామని చెప్పారు. కాగా విద్యార్థులు పరీక్షలు రాయకుండా భవిష్యత్తును నాశనం చేసుకోవద్దని వారు కోరారు. ఉద్యోగులు సహాయ నిరాకరణ చేయవచ్చునని, అయితే పరీక్షల సమయంలో విద్యార్థులకు మాత్రం సహకరించాలని వారు కోరారు.

తెలంగాణ కోసం ఎలాంటి త్యాగాలకైన సిద్ధమని చెప్పారు. ఇప్పటి వరకు అసెంబ్లీలో పోరాడామని, ఇకనుండి ప్రజలలోకి వెళ్లి తెలంగాణ కోసం పోరాడుతామని చెప్పారు. కాగా అంతకుముందు తెలంగాణ కాంగ్రెసు ఎమ్మెల్యేలతో ముఖ్యమంత్రి కిరణ్ కుమార్ రెడ్డి భేటీ అయ్యారు. వారికి ఆయన క్లాస్ తీసుకున్నారు. అంతకుముందు అసెంబ్లీలో ప్లకార్డులు ప్రదర్శించడంతో వారితో ఆయన భేటీ అయ్యారు. స్వపక్షంలో ఉండి విపక్షంలా ప్రవర్తించడం ఏమిటని వారిని అడిగినట్టుగా తెలుస్తోంది. ప్రభుత్వానికి సహకరించాలని ముఖ్యమంత్రి వారిని కోరినట్టుగా తెలుస్తోంది. సభలో ఉండి నిరసన తెలపవద్దని, ప్రభుత్వానికి సహకరించాలని ఆయన కోరారు. అయితే ఆయన కోరికను వారు తిరస్కరించి పూర్తిగా సమావేశాలనే బహిష్కరించడానికి నిర్ణయం తీసుకున్నారు.

Published On February 28, 2011