నాగం దీక్ష రేపే: టిడిపి నేత వేణుగోపాలాచారీ భేటీ

By Pratap

Published: Saturday, July 2, 2011, 17:25 [IST]

హైదరాబాద్‌: తెలంగాణ రాష్ట్ర సాధన కోసం, తెలంగాణవాదుల ఐక్యత కోసం తెలుగుదేశం పార్టీ నుంచి సస్పెన్షన్‌కు గురైన నాగం జనార్దన్ రెడ్డి రెండు రోజుల దీక్ష రేపే (ఆదివారం) ప్రారంభం కానుంది. హైదరాబాదులోని ఇందిరా పార్కు వద్ద ఆయన దీక్ష చేపట్టునున్నారు. రెండు రోజుల పాటు ఈ దీక్ష నిర్వహించాలని ఆయన తలపెట్టారు. ఈ దీక్ష నేపథ్యంలో తెలుగుదేశం ఆదిలాబాద్ జిల్లా నాయకుడు వేణుగోపాలా చారి నాగం జనార్దన్ రెడ్డితో భేటీ అయ్యారు.

నాగం జనార్దన్ రెడ్డి దీక్షకు వేణుగోపాలాచారి మద్దతు ప్రకటించారు. తెలంగాణ కోసం తాను నాగం జనార్దన్ రెడ్డికి మద్దతు తెలుపుతున్నట్లు ఆయన చెప్పారు. ఇన్నాళ్లు తటస్థంగా ఉంటూ వచ్చిన వేణుగోపాలాచారి నాగం జనార్దన్ రెడ్డిని కలుసుకోవడం ఆసక్తికరంగా మారింది. నాగం జనార్దన్ రెడ్డి దీక్షకు తెలంగాణ రాష్ట్ర సమితి (తెరాస), తెలంగాణ జెఎసి మద్దతు ప్రకటించాయి. కాంగ్రెసు తెలంగాణ ప్రాంతానికి చెందిన కొంత మంది నాయకులు కూడా ఆయన దీక్షకు మద్దతు చెప్పే అవకాశాలున్నాయి.

Published On July 2, 2011