మరోసారి భగ్గుమన్న ఉస్మానియా, ర్యాలీ ఉద్రిక్తం

By Srinivas

Published: Monday, September 19, 2011, 13:12 [IST]

హైదరాబాద్: ఉస్మానియా విశ్వవిద్యాలయం మరోసారి భగ్గుమన్నది. తెలంగాణ కోసం జరుగుతున్న సకల జనుల సమ్మెకు మద్దతుగా ఉస్మానియా విశ్వవిద్యాలయ టిఆర్ఎస్వీ విద్యార్థులు సోమవారం ఉస్మానియా ఆర్ట్స్ కళాశాల నుండి సచివాలయానికి చలో సెక్రటరియేట్ కార్యక్రమాన్ని చేపట్టారు. ర్యాలీ సందర్భంగా అప్పటికే విశ్వవిద్యాలయంలో భారీగా పోలీసులు మోహరించారు. ఉదయం ఆర్ట్స్ కళాశాల నుండి టిఆర్ఎస్వీ విద్యార్థులు ర్యాలీగా బయలు దేరారు. విద్యార్థుల ర్యాలీ ఎన్సీసీ గేటు వద్దకు చేరుకోగానే పోలీసులు వారిని అడ్డుకున్నారు. పోలీసులు, విద్యార్థులకు మధ్య తోపులాట జరిగింది. విద్యార్థులు పోలీసుల పైకి రాళ్లు రువ్వారు. పోలీసులు గో బ్యాక్, జై తెలంగాణ అంటూ నినాదాలు చేశారు. పోలీసులు విద్యార్థుల బాష్పవాయువు ప్రయోగించారు.

దీంతో పరిస్థితి ఉద్రిక్తంగా మారింది. విద్యార్థులు జామై ఉస్మానియా నుండి సచివాలయం వెళ్లేందుకు ప్రయత్నాలు చేశారు. పోలీసులు వారి ప్రయత్నాన్ని అడ్డుకున్నారు. మరోవైపు నిజాం కళాశాలలోనూ పరిస్థితి ఉద్రిక్తతకు దారి తీసింది. ఆందోళన చేస్తున్న విద్యార్థులను పోలీసులు అడ్డుకోవడంతో వారు రాళ్లు రువ్వారు. పలువురికి గాయాలయ్యాయి.

Published On September 19, 2011