ఆజాద్‌ది నిజమైన ఎన్‌కౌంటరే: సుప్రీంకోర్టుకు సిబిఐ

By Pratap

Published: Saturday, March 17, 2012, 8:41 [IST]

న్యూఢిల్లీ: మావోయిస్టు అగ్రనేత చెరుకూరి రాజ్‌కుమార్ అలియాస్ ఆజాద్ నిజమైన ఎన్‌కౌంటర్‌లోనే మరణించినట్లు సీబీఐ అధికారులు సుప్రీంకోర్టుకు తెలిపారు. పౌర హక్కుల సంఘాలు, విప్లవ సంస్థలు ఆరోపిస్తున్నట్టు ఆయనను పట్టుకొని చంపారనేందుకు ఆధారాలేవీ లభించలేదంటూ పది నెలల పాటు దర్యాప్తు చేసి తయారుచేసిన నివేదికను సిబిఐ కోర్టుకు సమర్పించింది. ఈ నివేదికలోని అంశాలను జస్టిస్ అఫ్తాబ్ అలమ్, జస్టిస్ రంజన్ ప్రకాశ్ దేశాయ్‌ల బెంచ్ శుక్రవారం వెల్లడించింది.

2010, జూలై ఒకటో తేదీన ఆదిలాబాద్ జిల్లా వాంకిడి ప్రాంతంలో మావోయిస్టు పార్టీ అధికార ప్రతినిధి ఆజాద్, జర్నలిస్టు హేమచంద్ర పాండేల మృతదేహాలను గుర్తించడం, ఎదురుకాల్పుల్లోనే వారు చనిపోయినట్టు పోలీసులు చెప్పగా, కాదు పట్టుకొని చంపారని పౌర హక్కుల సంస్థలు ఆరోపించడం తెలిసిందే. దీనిపై హేమచంద్ర పాండే సహచరి బబితా పాండే, ప్రముఖ సామాజిక వేత్త అగ్నివేశ్ సుప్రీంకోర్టును ఆశ్రయించగా, సీబీఐ దర్యాప్తునకు ఆదేశించిన విషయం తెలిసిందే.

అయితే, సీబీఐ సమర్పించిన నివేదికను పరిశీలించాక మాత్రం, ఆజాద్ బూటకపు ఎన్‌కౌంటర్‌లో చనిపోలేదని సుప్రీంకోర్టు ప్రాథమిక నిర్ధారణకు వచ్చేసింది. పౌర హక్కుల సంఘం తరపున వాదించిన ప్రశాంత్ భూషణ్ కోరిక మేరకు, దర్యాప్తు తుది నివేదికను ఆయనకు ఇచ్చేందుకు కోర్టు అంగీకరించింది. కోర్టు రిజస్ట్రీలో నివేదికను చూసుకోవచ్చునని, అయితే అందులో వివరాలను మాత్రం బయటపెట్టరాదని షరతు విధించింది. సీబీఐ దర్యాప్తు నివేదికపై తమ అభిప్రాయం, అభ్యంతరాలను పిటిషనర్లు వెల్లడించేందుకు వీలుగా వచ్చే నెల 13వ తేదీకి విచారణను వాయిదా వేసింది.

Published On March 17, 2012