దోచింది దాచుకోవడమే ఆశయం: జగన్ పార్టీపై బొత్స

By Pratap

Published: Wednesday, March 21, 2012, 18:33 [IST]

హైదరాబాద్: దోచుకున్నది దాచుకోవడమే వైయస్ జగన్ నాయకత్వంలోని వైయస్సార్ కాంగ్రెసు పార్టీ లక్ష్యం, ఆశయమని పిసిసి అధ్యక్షుడు బొత్స సత్యనారాయణ అన్నారు. ఉప ఎన్నికల ఫలితాలపై ఆయన మీడియా ప్రతినిధుల వద్ద బుధవారం స్పందించారు. వైయస్సార్ కాంగ్రెసు, తెలంగాణ రాష్ట్ర సమితి (తెరాస) ఆశయాలు, లక్ష్యాలు వేర్వేరని ఆయన అన్నారు. దోచుకుంది దాచుకోవడం జగన్ పార్టీ లక్ష్యం, ఆశయమని ఆయన అన్నారు. కోవూరు ఫలితం ప్రజల క్షణికావేశ ఫలితమని ఆయన అన్నారు. తెరాస ఏది చేసినా తెలంగాణ రాష్ట్ర సాధన కోసమే చేస్తుందని, తెరాస ఆశయం, లక్ష్యం తెలంగాణ సాధన అని ఆయన అన్నారు. ఆంద్రకు వైయస్సార్ కాంగ్రెసు, తెలంగాణకు తెరాస పరిమితమని ఆయన వ్యాఖ్యానించారు.

ఉప ఎన్నికల ఫలితాలు ఆశాజనకంగా లేవని ఆయన అన్నారు. లోపాలను సరిదిద్దుకుని భవిష్యత్తు ఎన్నికలకు సమాయత్తమవుతామని ఆయన అన్నారు. ఉప ఎన్నికల ఫలితాలకు బాధపడి మంత్రి డిఎల్ రవీంద్రా రెడ్డి ఏదో మాట్లాడి ఉంటారని ఆయన అన్నారు. కోవూరులో మెరుగైన ఫలితం కోసం ప్రయత్నించామని ఆయన అన్నారు. ఉప ఎన్నికల ఫలితాలను సమీక్షించుకుంటామని ఆయన అన్నారు. ఫలితాలకు తాను కూడా బాధ్యత వహిస్తానని ఆయన అన్నారు. మహబూబ్‌నగర్ అభ్యర్థి ఎంపికలో పొరపాటు చేశామని ఆయన అంగీకరించారు. తాము ఏకపక్ష నిర్ణయాలు తీసుకుని ఉంటే భవిష్యత్తులో సరిదిద్దుకుంటామని ఆయన అన్నారు. తాము తప్పుకోవడం, రాజీనామా చేయడం వంటి విషయాలపై పార్టీ అధిష్టానం నిర్ణయం తీసుకుంటుందని ఆయన అన్నారు.

Published On March 21, 2012