జగన్ కు కేవీపీ లేఖ-కేంద్రం మాట విని ఏపీకి ద్రోహం చేయొద్దు-వైఎస్సార్ కల నెరవేరదంటూ..

ఏపీలో వైసీపీ ప్రభుత్వం కేంద్రంతో కొనసాగిస్తున్న సంబంధాల నేపథ్యంలో రాష్ట్రంలోని ఓ కీలక ప్రాజెక్టుకు జరుగుతున్న అన్యాయంపై సీఎం జగన్ కు కాంగ్రెస్ మాజీ ఎంపీ కేవీపీ రామచంద్రరావు లేఖ రాశారు.

విజయవాడ : ఏపీ విభజన సందర్భంగా రాష్ట్రానికి జీవనాడి అయిన పోలవరం ప్రాజెక్టు నిర్మాణానికి కేంద్రం పచ్చజెండా ఊపింది. ఆ తర్వాత చంద్రబాబు ప్రభుత్వం కోరిక మేరకు దీని నిర్మాణ బాధ్యత కూడా రాష్ట్రానికే అప్పగించి నిధులిస్తోంది. అయితే ఇప్పుడు నిధుల్లేవన్న కారణంతో ప్రాజెక్టు ఎత్తు తగ్గించుకోమని కోరుతోంది. దీనిపై అభ్యంతరం వ్యక్తంచేస్తూ ప్రధానికి తాజాగా లేఖ రాసిన కాంగ్రెస్ మాజీ ఎంపీ కేవీపీ రామచంద్రరావు ఇవాళ సీఎం జగన్ కు కూడా లేఖ రాశారు.

పోలవరం ప్రాజెక్టు ఎత్తు తగ్గింపు వల్ల కలిగే నష్టాలను వివరిస్తూ కాంగ్రెస్ మాజీ ఎంపీ కేవీపీ రామచంద్రరావు.. ఇవాళ సీఎం జగన్ కు లేఖ రాశారు. ఇందులో ఆయన పొలవరం ప్రాజెక్టు నిర్మాణం నిలిచిపోవడం బాధగా ఉందన్నారు. నిధులు లేవనే కారణంతో పోలవరం ఎత్తు తగ్గించే ఆలోచన లో కేంద్రం ఉందని కేవీపీ గుర్తుచేశారు. ఎత్తు తగ్గింపు వల్ల జగన్ తండ్రి వైఎస్ రాజశేఖర్ రెడ్డి కలలు నెరవేరవని కేవీపీ స్పష్టంచేశారు.

పోలవరం ప్రాజెక్టు నిర్మాణం రాష్ట్రం చేతిలో ఉన్నందున కేంద్రం ఒత్తిడికి ఒప్పుకోవద్దని సీఎం జగన్ కు కేవీపీ సూచించారు.ఈ విషయంలో రాజీ పడితే రాష్ట్రానికి ద్రోహం చేసినట్లు అవుతుందన్నారు. ఎట్టి పరిస్థితుల్లో రిజర్వాయర్ లెవెల్ 150 అడుగులకు తగ్గకుండా నిర్మాణం చేపట్టి రైతుల ప్రయోజనాలు కాపాడాలని తన లేఖలో కేవీపీ రామచంద్రరావు కోరారు. గతంలో టీడీపీ సహా ఇతర విపక్షాలు పోలవరం ఎత్తు తగ్గింపును వ్యతిరేకిస్తూ ఆందోళనలు చేశాయి. అయితే అప్పట్లో సీఎం జగన్ మాత్రం ఎత్తు తగ్గించే ప్రసక్తే లేదని తేల్చిచెప్పారు. కానీ తాజాగా నిధుల కొరత, సాంకేతిక కారణాలు, న్యాయవివాదాల్ని సాకుగా చూపి ప్రాజెక్టు ఎత్తు తగ్గింపుకు కేంద్రం ప్రయత్నిస్తున్నట్లు వార్తలు రావడంతో కేవీపీ దీనిపై స్పందించి లేఖలు రాస్తున్నారు.

English summary

former congress mp kvp ramachandra rao on today wrote ys jagan on polvaram project and request him not to agree for reduction of its height.