కాకినాడ, నర్సాపూర్, హైదరాబాద్, బెంగళూరు ప్రయాణికులకు రైల్వే గుడ్ న్యూస్..!

దక్షిణ మధ్య రైల్వే పరిధిలోని వివిధ రాష్ట్రాల్లో పండుగలు, ఇతర కారణాలతో ప్రయాణికుల రద్దీ కొనసాగుతోంది. ఇప్పటికే పలు ప్రత్యేక రైళ్లను నడుపుతున్నా రద్దీ మాత్రం తగ్గడం లేదు. ఈ నేపథ్యంలో అధికారులు ఇవాళ మరో కీలక నిర్ణయం తీసుకున్నారు. ఇప్పటికే ప్రకటించిన పలు ప్రత్యేక రైళ్లను మరికొంతకాలం పొడిగిస్తూ ఇవాళ ప్రకటన విడుదల చేశారు. కాకినాడ, నరసాపురం, బెంగళూరు, హైదరాబాద్, మైసూరు వంటి రూట్లలో ఇలా మొత్తం 48 ప్రత్యేక రైళ్లను జనవరి వరకూ పొడిగించారు.

ప్రయాణికుల రద్దీని క్లియర్ చేసేందుకు ఇప్పటికే నడుపుతున్న పలు రైళ్లను మరికొంతకాలం పొడిగిస్తున్నట్లు దక్షిణ మధ్య రైల్వే తెలిపింది. ఇలా పొడిగించిన ప్రత్యేక రైళ్లలో కాకినాడ నుంచి మైసూరుకు ప్రతీ సోమ, శుక్రవారాల్లో నడుపుతున్న 07033 నంబర్ రైలును డిసెంబర్ 1 నుంచి జనవరి 12 వరకూ పొడిగించారు. దీంతో మొత్తం 13 సర్వీసులు అందుబాటులో ఉంటాయి. అలాగే మైసూరు నుంచి కాకినాడ టౌన్ కు ప్రతీ మంగళ, శనివారాల్లో నడుపుతున్న రైలు నంబర్ 07034 ప్రత్యేక రైలు డిసెంబర్ 2 నుంచి జనవరి 13 వరకూ నడపాలని నిర్ణయించారు. ఇలా మరో 13 సర్వీసులు అందుబాటులో ఉంచారు.

నరసాపురం నుంచి ఎస్ఎంవీటీ బెంగళూరుకు ప్రతీ శుక్రవారం నడుపుతున్న ప్రత్యేక రైలు నంబర్ 07153 ను జనవరి 2 నుంచి 9 వరకూ నడపాలని నిర్ణయించారు. అలాగే బెంగళూరు నుంచి నరసాపురానికి ప్రతీ శనివారం నడుపుతున్న ప్రత్యేక రైలు నంబర్ 07154ను కూడా జనవరి 3 నుంచి జనవరి 10 వరకూ నడపాలని నిర్ణయించారు. ఈ లెక్కన మొత్తం నాలుగు సర్వీసులు అందుబాటులోకి వస్తాయి.

మరోవైపు హైదరాబాద్ నుంచి భువనేశ్వర్ కు ప్రతీ మంగళవారం నడుపుతున్న ప్రత్యేక రైలు నంబర్ 07165 ను డిసెంబర్ 2 నుంచి జనవరి 27 వరకూ నడపాలని నిర్ణయించారు. అలాగే భువనేశ్వర్ నుంచి హైదరాబాద్ కు ప్రతీ బుధవారం నడుపుతున్న ప్రత్యేక రైలు నంబర్ 07166ను డిసెంబర్ 3 నుంచి జనవరి 28 వరకూ నడపాలని నిర్ణయించారు. ఈ లెక్కన 18 సర్వీసులు అందుబాటులో ఉంచుతున్నారు. ప్రయాణికులు ఈ అప్డేట్ గమనించి టికెట్లు బుక్ చేసుకోవచ్చు.