Godavari Express: అది రైలు కాదు 52 ఏళ్ల ఎమోషన్- రైల్వే అరుదైన అవార్డు..!

ప్రపంచంలోనే భారీ సంఖ్యలో ఉద్యోగుల్ని కలిగిన రెండో ప్రభుత్వ సంస్థగా గుర్తింపు పొందిన భారతీయ రైల్వేలు కొన్నేళ్లుగా ఎన్నో మార్పులకు లోనవుతున్నాయి. ముఖ్యంగా కోవిడ్ తర్వాత మారిన ప్రయాణికుల అవసరాలకు అనుగుణంగా కేంద్రం కూడా రైల్వేల్లో భారీ మార్పులు చేస్తోంది. ఇందులో నుంచి పుట్టుకొచ్చినవే వందేభారత్, అమృత్ భారత్ వంటి ప్రీమియం రైళ్లు. అయితే ఎన్ని రైళ్లు వచ్చినా ఇంకా అర్ధ శతాబ్దంగా రాకపోకలు సాగిస్తున్న అరుదైన రైళ్లు ఎన్నో ఉన్నాయి.

వీటిలో తెలుగు రాష్ట్రాల మధ్య గత 52 ఏళ్లుగా రాకపోకలు సాగిస్తున్న గోదావరి ఎక్స్ ప్రెస్ (godavari express) కూడా ఒకటి. హైదరాబాద్ -విశాఖపట్నం మధ్య నిరంతరాయంగా ప్రతీ రోజూ రాకపోకలు సాగిస్తున్న ఈ రైలుకు ఎంతో డిమాండ్ ఉంది. అలాగే ప్రస్తుతం రైల్వే అత్యుత్తమంగా నిర్వహిస్తున్న రైళ్లలో ఇది కూడా ఒకటి. ప్రీమియం రైలు కాకపోయినా మెయింటెనెన్స్, రాకపోకల సమయాల నిబద్ధత వంటి అంశాల్లో గోదావరి ఎక్స్ ప్రెస్ కు మంచి పేరుంది. వీటి కారణంగా రైల్వే ఈ రైలుకు అరుదైన అవార్డు ఇచ్చింది.

52 Years. One Legend. Infinite Memories. 🚆
Celebrated the iconic T. No.12728 Hyderabad → Visakhapatnam #Godavariexpress, More than a train, an emotion since 1974. 2025 SCR's Best Maintained Train Award 🛡️🏆#Celebrations #IndianRailways pic.twitter.com/sKmfm2mQvK

— South Central Railway (@SCRailwayIndia) February 2, 2026

దక్షిణ మధ్య రైల్వే తాజాగా గోదావరి ఎక్స్ ప్రెస్ కు అత్యుత్తమంగా నిర్వహిస్తున్న రైలు (best maintained train) అవార్డు ప్రకటించింది. 1974 నుంచి ఇప్పటివరకూ నిరంతరాయంగా రాకపోకలు సాగిస్తున్న ఈ రైలు కేవలం రైలు మాత్రమే కాదని ఓ ఎమోషన్ అంటూ దక్షిణమధ్య రైల్వే ఇవాళ ఓ ట్వీట్ చేసింది. ఇందులో గోదావరి ఎక్స్ ప్రెస్ రైలు ఫొటోలతో పాటు దానికి ప్రకటించిన అవార్డు ఫొటోల్ని కూడా ప్రయాణికులతో పంచుకుంది. ఇది చూసిన ప్రయాణికులు గోదావరి ఎక్స్ ప్రెస్ ను అభినందనలతో ముంచెత్తుతున్నారు.