అమూల్ కోసమే పాలవెల్లువ-జనసేన ఆరోపణలు-త్వరలో అంబులెన్స్ స్కాం బయటపెడతాం..

ఏపీలో జగనన్న పాల వెల్లువ పథకంలో రూ.2887 కోట్ల అవినీతి జరిగినట్లు ఆరోపిస్తున్న జనసేన పార్టీ ఇవాళ తమ దాడిని మరింత తీవ్రతరం చేసింది. జగనన్న పాలవెల్లువ పథకంలో అవినీతి జరిగిందని ఆధారాలతో సహా జనసేన బయటపెడితే... దీనిపై స్పందించాల్సిన మంత్రి వ్యక్తిగత విమర్శలతో సమస్యను పక్కదారి పట్టించే ప్రయత్నం చేశార పార్టీ రాజకీయ వ్యవహారాల కమిటీ ఛైర్మన్ నాదెండ్ల మనోహర్ విమర్శించారు. ఆయన శాఖలో అవినీతే జరగకపోతే పథకంలో లబ్ధిదారుల జాబితాను విడుదల చేయాలని డిమాండ్ చేశారు.

సంక్షేమ పథకాలు అర్హులైన లబ్ధిదారులకు అందాలని, అవినీతికి ఆస్కారం లేకుండా పారదర్శకంగా అమలు కావాలని పథకాల్లో జరుగుతున్న అవకతవకలపై జనసేన పార్టీ ప్రశ్నిస్తుంటే... బాధ్యతాయుతంగా సమాధానం చెప్పాల్సిన సంబంధిత మంత్రి మాత్రం వ్యక్తిగత విమర్శలు చేస్తున్నారని నాదెండ్ల విమర్శించారు. వైసీపీ ప్రభుత్వాన్ని మేము అడిగిన ప్రశ్నలు మూడే మూడేనన్నారు. పాడిపశువుల కొనుగోలుపై ఇద్దరు మంత్రులు చెప్పిన సంఖ్యలో తేడాలు ఎందుకు ఉన్నాయి?, మీరు చెప్పినట్లే 3.94 లక్షల పాడిపశువులు కొనుగోలు చేసి ఉంటే పాల ఉత్పత్తి ఎందుకు పెరగలేదు?, అవినీతి జరగకపోతే లబ్ధిదారుల జాబితాను బయటపెట్టడం లేదు? అని నాదెండ్ల నిలదీశారు.

ఈ మూడు ప్రశ్నలకు సమాధానం చెప్పమని సంబంధిత మంత్రిని డిమాండ్ చేస్తే ఆయన... రాష్ట్రంలో ఉన్న డెయిరీల పరిస్థితి గురించీ... చిత్తూరు డెయిరీ, సంఘం డెయిరీలో ఏం జరిగింది? చంద్రబాబు గారు, పవన్ కళ్యాణ్ గారు ఏం మాట్లాడారు? వ్యక్తిగత విమర్శలు, రాజకీయ అంశాలు మాట్లాడి సమస్యను పక్కదారి పట్టించాలని చూశారని నాదెండ్ల ఆరోపించారు. చేయూత పథకం మహిళల ఆర్థిక వృద్ధి కోసం పెట్టారా? లేక అమూల్ డెయిరీ కోసం పెట్టారా? అనేది మంత్రిగారు సమాధానం చెప్పాలన్నారు. లబ్ధిదారులు అమూల్ కు సహకరించకపోతే సంక్షేమ పథకం నుంచి తప్పిస్తారా? ఇదెక్కడి న్యాయం? ఇదేం పథకం అని ప్రశ్నించారు.

English summary

janasena leader nadendla manohar lashed out at ap minister seediri appalaraju for diverting thier allegations on jaganna palavelluva scheme.